Cila është gjëja e fundit që prisni të shihni kur shikoni lart në tavanin e një kishe? Sigurisht, ka shumë përgjigje interesante që mund të vijnë ndër mend, por “një krokodil” renditet padyshim midis më të çuditshmeve prej tyre. Por nëse udhëtoni në komunën e vogël të Curtatone, në Lombardi, Itali, do të gjeni një kishë me një krokodil pesëshekullor që varet nga tavani. Është një pamje e veçantë, për të thënë të paktën, por që ka ekzistuar për aq kohë sa dikush mund të kujtojë. Se si përfundoi krokodili në Santuario Della Beata Vergine Maria Delle Grazie është dhe ndoshta do të mbetet një mister, por qëllimi i tij kishte qenë i lidhur me simbolikën fetare.
Në kohët e lashta, Krishterimi i shoqëronte krijesat reptiliane si gjarpërinjtë, dragonjtë dhe krokodilët me të keqen, qoftë si personifikime të djallit ose thjesht kafshë që i çojnë njerëzit në mëkate. Pra, lidhja e tij me zinxhir lart në tavanin e kishës shërbeu si paralajmërim për besimtarët, por edhe si simbol i fitores së së mirës mbi të keqen.
Ndërsa në pamje të parë mund të duket si një objekt reklamimi, ky është një krokodil i vërtetë i balsamosur i Nilit (Crocodilus niloticus) që besohet të jetë të paktën 500 vjeç, me vetë kishën që daton që nga shekulli i 13-të. Me kalimin e viteve, shumë legjenda rreth origjinës së kafshës qarkulluan nëpër Lombardi, por dy më të njohurat përfshijnë një kopsht zoologjik vendas dhe dy vëllezër të guximshëm që luftuan kundër kafshës.
Disa besojnë se krokodili u kap dhe u vra pasi iku nga një kopsht zoologjik privat në pronën e Francesco Gonzaga, ndërsa të tjerë pretendojnë se kafsha një ditë sulmoi dy vëllezër që pushonin në brigjet e lumit Mincio. Njëri prej tyre kërkoi ndihmën e Virgjëreshës së Shenjtë dhe i pajisur me një thikë sulmoi dhe vrau krokodilin.
Pavarësisht nëse i besoni apo jo këtyre historive, krokodili i varur i Santuario Della Beata Vergine Maria Delle Grazie është një atraksion që ia vlen. Është i çuditshëm, por gjithashtu flet për aftësitë e balsamosjes së murgjve, puna e të cilëve ishte ta shndërronin krokodilin në një “ekspozitë” të përhershme.
