Magnezi është kthyer në një nga suplementet më të përfolura nga njerëzit që kërkojnë mënyra natyrale për të fjetur më mirë. Në rrjetet sociale, shumë persona pretendojnë se ky mineral i ka ndihmuar të qetësohen dhe të bëjnë gjumë më cilësor.
Ndryshe nga shumë këshilla të tjera virale, për magnezin ekzistojnë edhe të dhëna shkencore që mbështesin përdorimin e tij. Specialistët thonë se ai ndihmon në qetësimin e sistemit nervor, relaksimin e muskujve dhe mund të ndikojë pozitivisht në ritmin cirkadian, duke ndihmuar trupin të flejë në kohën e duhur.
Sipas neurologut dhe specialistit të gjumit, Dr. W. Christopher Winter, rreth 50% e popullsisë nuk arrin sasinë e rekomanduar ditore të magnezit.
Kjo mungesë e lehtë nuk do të thotë domosdoshmërisht problem mjekësor, por ia vlen të merret në konsideratë
-shpjegon ai.
Kur duhet marrë magnezi për gjumë?
Ekspertët sugjerojnë që magnezi të merret 1 deri në 2 orë para gjumit. Kjo i jep trupit kohë të përfitojë nga efektet qetësuese dhe ul mundësinë e shqetësimeve në stomak.
Disa persona mund ta marrin edhe 30 minuta para gjumit, por gjithçka varet nga reagimi individual i trupit.
Si ndihmon në gjumë?
Magnezi mund të ndikojë pozitivisht duke:
-Relaksuar muskujt
-Qetësuar sistemin nervor
-Rregulluar nivelet e GABA-s, neurotransmetues që ndihmon në përgjumje
-Mbështetur prodhimin e melatoninës, hormonit të gjumit
-Ndihmuar në ruajtjen e gjumit gjatë natës
Cili është lloji më i mirë?
Për gjumë, forma më e rekomanduar është magnez glicinat. Ai përthithet mirë nga organizmi dhe ka më pak gjasa të shkaktojë probleme me tretjen.
Ndërsa forma si magnez oksid, citrat apo hidroksid përdoren më shpesh për kapsllëk dhe mund të mos jenë zgjedhja ideale për gjumë.
Nëse dyshoni për mungesë magnezi, këshillohet të bëni analiza dhe të konsultoheni me mjekun përpara përdorimit të rregullt të suplementeve.
