Ylli i muzikës Drake ka pësuar një tjetër humbje të bujshme financiare, pasi basti i tij për fitoren surprizë të Jake Paul kundër Anthony Joshua dështoi.
Artisti kanadez humbi plot 200 mijë dollarë, pasi Joshua triumfoi ndaj Paul në raundin e gjashtë të përballjes së zhvilluar këtë të shtunë në Miami.
Drake kishte shpresuar të fitonte një shumë marramendëse prej 1.64 milion dollarësh, nëse Jake Paul do të arrinte të mposhtte boksierin britanik të peshave të rënda. Megjithatë, kjo mbeti vetëm një parashikim i gabuar, ndërsa Paul pësoi humbjen e dytë në karrierën e tij në ring.
Aktori i shndërruar në reper kishte treguar hapur bastin e tij në Instagram, duke publikuar shumën e vënë dhe duke u mburrur me zgjedhjen e tij përpara meçit. Por, siç ka ndodhur edhe herë të tjera, parashikimi i Drake rezultoi i pafat.
Reperi 39-vjeçar njihet tashmë për një seri humbjesh në bastet sportive, aq sa kjo prirje ka marrë edhe një emër mes fansave dhe mediave: “Mallkimi i Drake”, një fenomen që duket se u konfirmua edhe një herë me këtë përballje.
