Familja Beckham është shfaqur sot më e bashkuar se kurrë në rrugët e Parisit, duke dhënë një mesazh të qartë uniteti mes zërave për tensione të brendshme familjare.
Victoria dhe David Beckham u panë të hënën, më 26 janar, në kryeqytetin francez së bashku me fëmijët e tyre Romeo (23 vjeç), Cruz (20 vjeç) dhe Harper (14 vjeç). Në dalje nuk munguan as partneret e djemve: Kim Turnbull, e dashura e Romeo-s, dhe Jackie Apostel, partnerja e Cruz.
Sipas mediave ndërkombëtare, arsyeja kryesore e kësaj daljeje familjare është nderimi prestigjioz që Victoria Beckham pritet të marrë sot nga Qeveria Franceze, titulli “Knight of the National Order of Arts and Letters”, një vlerësim i rëndësishëm për kontributin e saj në modë, art dhe kulturë.
Kjo shfaqje publike vjen vetëm pak ditë pas deklaratës së gjatë dhe tronditëse të djalit të madh të familjes, Brooklyn Beckham, i cili ngriti publikisht akuza për një përplasje të hershme familjare, duke ndezur debat të gjerë në media dhe rrjetet sociale.
Pavarësisht zhurmës dhe spekulimeve, David dhe Victoria Beckham nuk kanë reaguar ende zyrtarisht për situatën, ndonëse David ka lënë të kuptohet përmes disa deklaratave indirekte se familja po kalon një periudhë të ndjeshme.
Dalja e tyre e fundit në Paris shihet si një përpjekje për të ruajtur imazhin e unitetit dhe për të treguar se, pavarësisht problemeve të brendshme, familja Beckham qëndron e bashkuar përballë publikut dhe e fokusuar tek fëmijët dhe angazhimet profesionale.
Pamjet nga Parisi janë shpërndarë gjerësisht në mediat ndërkombëtare, duke e kthyer këtë dalje në një mesazh të fortë simbolik: Beckham-ët nuk lejojnë që drama familjare të errësojë suksesin dhe prestigjin e tyre.
