Gjiganti teknologjik amerikan, Meta, mund t’i përdorë postimet në platformat e veta, Facebook dhe Instagram, nga përdoruesit në Bashkimin Europian për ta trajnuar softuerin e tij të Inteligjencës Artificiale (IA), Meta AI, pasi afati për refuzim nga përdoruesit skadoi sot.
Për t’i përmirësuar modelet e veta të IA-së, kompania planifikon ta analizojë të gjithë përmbajtjen publike të publikuar nga përdoruesit e rritur nëpër vendet e BE-së, me përjashtim të postimeve nga përdoruesit që kanë kundërshtuar, siç raporton agjencia gjermane e lajmeve DPA.
Një gjykatë gjermane hodhi poshtë të premten e kaluar një ankesë nga Agjencia për Mbrojtjen e Konsumatorëve në landin perëndimor të Renit Verior-Vestfalisë. Kjo agjenci akuzoi Meta-n për shkeljen e rregullave të Bashkimit Europian lidhur me mbrojtjen e të dhënave.
Gjykata gjeti se përdorimi i të dhënave nga Meta i shërben një qëllimi legjitim që nuk mund të arrihet me metoda më pak ndërhyrëse dhe theksoi se kompania është zotuar për mospërdorimin e të dhënave të ndjeshme, si emrat, numrat e telefonave e të dhënat e llogarive.
Bisedat në aplikacionin WhatsApp, po ashtu në pronësi të Meta-s, nuk do të përdoren për trajnime të IA-së. Por, komunikimet me asistentin e Meta-s me IA konsiderohen publike dhe munden, po ashtu, të përdoren për trajnime.
