Ukraina ka publikuar detaje të reja mbi operacionin e veçantë të Shërbimit të Sigurisë së Ukrainës, i cili u zhvillua brenda territorit rus, mijëra kilometra larg vijave të frontit. Në këtë sulm të koduar “Rrjeti i Merimangës,” u përdorën 117 dronë me pilotë të veçantë, duke goditur katër aeroporte strategjike ruse që strehojnë bombardues si A-50, Tu-95 dhe Tu-22 M3.
LEXO EDHE: Rusia dhe Ukraina gati për raundin e dytë të bisedimeve të paqes në Turqi!
Si rezultat, u shkatërruan të paktën 13 aeroplanë luftarakë dhe shumë të tjerë u dëmtuan rëndë, me dëme të vlerësuara në rreth 7 miliardë dollarë. Presidenti ukrainas Volodymyr Zelensky e cilësoi operacionin si “një rezultat absolutisht të shkëlqyer” dhe theksoi se ishte realizuar vetëm nga Ukraina.
Ai gjithashtu zbuloi se “zyra” e operacionit ndodhej pranë selisë së Shërbimit Federal të Sigurisë së Rusisë (FSB), duke nënvizuar guximin dhe kompleksitetin e misionit. Zelensky falënderoi gjeneralin Vasyl Malyuk dhe kërkoi që detajet e mëtejshme të operacionit të bëhen publike në kohën e duhur.
Mesazhi i tij përfundimtar ishte i qartë: Ukraina po mbron veten dhe po bën gjithçka që Rusia të ndiejë nevojën për të përfunduar këtë luftë që ajo ka nisur.
