Modelja shqiptare Misse Beqiri po rikthehet fuqishëm në vëmendjen e mediave ndërkombëtare, pikërisht në një moment kur emri i saj është rishfaqur në dokumente të lidhura me financierin amerikan Jeffrey Epstein, një nga figurat më të diskutueshme të dekadës së fundit.
Sipas raportimeve të The Sun, në dokumentet e publikuara së fundmi përmendet një takim i vitit 2011 mes Beqirit dhe Epstein.
Burime pranë modeles kanë theksuar se në atë kohë ajo ishte në fillimet e karrierës, shumë e re dhe pa dijeni për të kaluarën penale të financierit.
Takimi, sipas të njëjtave burime, ishte organizuar pas premtimeve për mundësi në botën e modelingut. Ata insistojnë se asgjë e papërshtatshme nuk ka ndodhur dhe se sot Beqiri shpreh keqardhje për viktimat e çështjes, duke besuar se drejtësia duhet të vihet në vend.
Raportimet shtojnë se Epstein kishte shfaqur interes të veçantë për modelen shqiptare, duke i propozuar një udhëtim me avion privat drejt Parisit për një sfilatë mode, si edhe një automjet luksoz me vlerë rreth 100 mijë paund.
Takimi i parë thuhet se u zhvillua në rezidencën e tij shtatëkatëshe në Manhattan, me një vlerë të përllogaritur prej 37 milionë paundësh. Brenda vilës, Beqiri ishte surprizuar nga prania e një klase të improvizuar me banka shkollore, por kishte qëndruar me shpresën për të përfituar profesionalisht.
Ky takim kishte ndodhur vetëm pak muaj pasi Epstein kishte përfunduar një dënim prej 13 muajsh burg dhe një vit arrest shtëpie, pas vendimit të vitit 2008 për sigurimin e një të miture për prostitucion. Sipas një miku të modeles, ajo nuk kishte dijeni për këtë të kaluar në atë periudhë.
Në të njëjtën kohë, Beqiri po përjeton një rikthim në ekran me pjesëmarrjen në sezonin e ri të Ladies of London: The New Reign. Ajo e ka përshkruar si “surreal” momentin kur pa billboardin me imazhin e saj, duke theksuar se rrugëtimi i saj ka qenë gjithçka përveçse i lehtë.
Në jetën personale, modelja u bë e njohur edhe si bashkëshortja e ish-portierit të Manchester United, Anders Lindegaard, me të cilin u martua në vitin 2016 dhe me të cilin ka një djalë. Më pas, ajo pati një lidhje të trazuar me Jake Hall, nga e cila lindi vajza e saj.
Një nga plagët më të rënda në jetën e saj mbetet vrasja e vëllait, Flamur Beqiri, i cili u qëllua për vdekje në prag të Krishtlindjes 2019 në Londër. Për këtë ngjarje, Anis Hemissi u dënua me burgim të përjetshëm me minimum 35 vite.
Ndërsa hap një kapitull të ri në televizion dhe rikthehet në qendër të vëmendjes, e kaluara vazhdon ta ndjekë Misse Beqirin. Mes famës, polemikave dhe sfidave personale, historia e saj mbetet një ndër më të komentuarat në mediat britanike.
