Anna Fox jeton vetëm, e vetmuar në shtëpinë e saj në New York City, e paaftë të dalë jashtë. Ajo e kalon ditën duke pirë verë (ndoshta shumë), duke parë filma të vjetër, duke kujtuar kohë më të lumtura… dhe duke spiunuar fqinjët e saj.
Pastaj familja Russell shpërngulet në shtëpinë përballë: një baba, një nënë dhe djali i tyre adoleshent. Familja perfekte. Por kur Ana, duke parë nga dritarja një natë, sheh diçka që nuk duhet ta shohë, bota e saj fillon të shkërmoqet dhe sekretet e saj tronditëse dalin në pah.
Çfarë është reale? Çfarë është e imagjinuar? Kush është në rrezik? Kush është në kontroll? Në këtë thriller diabolik tërheqës, askush – dhe asgjë – nuk është ajo që duket.
A.J. Finn jo vetëm që ka kapur, me dhembshuri, jetën e brendshme të një personi në depresion, por ka shkruar edhe një thriller magjepsës që do t’ju mbajë në hamendje deri në fjalinë e fundit. Një nga librat më të shitur që pushtoi botën, duke shitur miliona kopje në të gjithë globin, një thriller Hitchcock-ian i jashtëzakonshëm për një grua agorafobike që beson se ka qenë dëshmitare e një krimi në një shtëpi fqinje. Nuk është paranojë nëse po ndodh vërtet…
Anna Fox, dikur një psikologe e suksesshme për fëmijë, jeton vetëm në shtëpinë e saj në Harlem duke spiunuar fqinjët e saj, duke përzier ilaçe psikotrope me verë të kuqe, duke parë filma të vjetër dhe duke biseduar në forume. Që në fillim mësojmë se Anna vuan nga agorafobia (frika nga hapësirat e mbushura me njerëz), e shkaktuar nga një incident traumatik, duke e bërë të paaftë të dalë nga shtëpia pa pasur një atak paniku.
E bllokuar vetëm brenda shtëpisë së saj, ajo përdor një aparat fotografik për të parë ngjarjet në rrugë. Duke përdorur kamerën, ajo ndërhyn te fqinjët e saj, perdet e të cilëve janë të hapura. Ajo sheh familje që ndajnë darkën në tavolinë, fëmijë që bëjnë detyrat e shtëpisë në tavolinat e tyre dhe njerëz që mbërrijnë në shtëpi me buzëqeshje mikpritëse.
Një familje e re shpërngulet matanë rrugës. Mamaja, babai dhe djali i tyre. Ajo lidhet menjëherë me ta, duke menduar për burrin dhe vajzën e saj kur jetonin së bashku, një familje e lumtur me tre anëtarë. Pastaj, një natë, ajo sheh një krim të tmerrshëm që ndodh në njërën nga dhomat e tyre të gjumit. Por ja kthesa: Anna, e cila ka pirë dhe ka marrë ato pilula të lartpërmendura gjithë natën, nuk mund të provojë se ajo që pa ndodhi vërtet. Dhe askush, as policia dhe as fqinjët e saj, nuk e besojnë.
Kur Anna më në fund del jashtë shtëpisë dhe gjendja e saj mendore del jashtë kontrollit, ne jemi pikërisht në atë spirale të tmerrshme me të. Duket sikur çdo thriller këto ditë ka një narrator të pabesueshëm – dhe Anna Fox është gjithashtu një e tillë – por ndryshe nga shumë thriller të kohëve të fundit, kthesat e komplotit të “Gruaja në Dritare” janë vërtet të habitshme dhe tronditëse. Edhe adhuruesit e filmave do t’i adhurojnë referencat për Hitchcock dhe filma të tjerë klasikë.
Historia mori pak kohë për të filluar, por nuk kalon shumë kohë para se të të ‘thithi’ mendjen dhe në gjysmë të rrugës nuk mund të ndalesh së lexuari.
Ky roman konsiderohet si triller diabolik: askush dhe asgjë nuk është ashtu si duket. Lexuesi mbahet peng në çdo faqe të tij përmes agorafobisë, ankthit, depresionit, substancave abuzuese, vrasjeve, vdekjeve, etj. Që kur u hodh në qarkullim, vazhdon të bëjë për vete qindra-mijëra lexues me fuqinë e tij.
Me çdo kapitull të shkurtër, Finn të lë të duash më shumë. Një libër për t’u lexuar me një frymë, pastaj nuk mund të mos i mbyllësh perdet në apartamentin tënd…
