Një jaht gjigant dhe luksoz është në ndërtim e sipër dhe do t’ju kushtojë jashtëzakonisht shumë nëse do të dëshironit të jetonit në të. Pas daljes në treg të anijes më të madhe në botë, Icon of the Seas, që u nis nga Miami më 27 janar 2024, një tjetër jaht po tërheq vëmendjen e udhëtarëve.
I quajtur Ulyssia Gigayacht, ky jaht është vetëm 100 metra më i shkurtër se Icon of the Seas, por ka një koncept krejt të ndryshëm. Ai do të ketë vetëm 133 rezidenca dhe 22 suita, duke ofruar një përvojë shumë të ndryshme nga udhëtimet masive të anijeve të zakonshme. Ky jaht luksoz është në ndërtim nga miliarderi zviceran Frank Binder dhe pritet të ketë një kosto të jashtëzakonshme prej 1.5 miliardë dollarësh për ndërtimin.
Çmimi për të banuar në Ulyssia do të fillojë nga 10.5 milionë dollarë, ndërsa çmimi mesatar do të jetë rreth 19 milionë dollarë. Shtëpitë më të shtrenjta, mund të arrijnë deri në 60 milionë dollarë, me sipërfaqe që variojnë nga 1,787 deri në 15,100 metra katrorë.
Ndërtimi i jahtit pritet të nisë nga shtatori 2025 dhe të përfundojë deri në tetor 2029. Frank Binder, trashëgimtar i perandorisë farmaceutike Merck, ka shpjeguar se ideja e tij ishte të krijonte një jaht që ngjasonte më shumë me një jaht të vërtetë sesa me një anije udhëtimi. Ulyssia do të përdorë një sistem të avancuar hibrid, që përdor biokarburante dhe energji diellore për të pasur një ndikim minimal në mjedis.
Ky projekt përfaqëson një mundësi unike për ata që kërkojnë një jetesë luksoze në det, por që mund të përballojnë çmimet ekstreme të kësaj përvoje të jashtëzakonshme.
