Nën drejtimin e kryediplomatit të Gjermanisë, Heiko Maas, nesër zhvillohet Konferenca e Ministrave të Jashtëm të Ballkanit Perëndimor, në kuadër të Procesit të Berlinit. Konferenca ka për qëllim të parapërgatisë samitin e shefave të qeverive që në fillim të korrikut do të drejtohet nga kancelarja Angela Merkel. Shefave të diplomacive të vendeve të rajonit pritet t’iu bashkohen edhe ministra të jashtëm të disa shteteve anëtare të Bashkimit Europian, si dhe Eurokomisioneri i Zgjerimit, Olivér Várhelyi e Sekretari i Përgjithshëm i Shërbimit të Veprimit të Jashtëm Europian, Stefano Sannino.
Procesi i Berlinit është nismë e kancelares Merkel, e krijuar në vitin 2014. Në fokus ka përmirësimin e bashkëpunimit rajonal mes vendeve të Ballkanit Perëndimor, për të mbështetur procesin e anëtarësimit europian të Shqipërisë, Kosovës, Maqedonisë së Veriut, Bosnje-Hercegovinës, Malit të Zi dhe Serbisë. Pas Gjermanisë nismëtare, organizatorë të samitit kanë qenë deri tani Austria, Franca, Britania e Madhe, Italia, Polonia dhe Bullgaria/Maqedonia e Veriut.
Gjithashtu, procesi konsiderohet “paradhomë e Unionit”. Një nga arritjet e deritanishme është miratimi i planit për tregun e përbashkët rajonal dhe afrimi i të rinjve nëpërmjet rrjetit RYCO (Regional Youth Cooperation Office). Por konfliktet e pazgjidhura mes vendeve në rajon kanë qenë pengesë e vazhdueshme për funksionimin si duhet të nismave të dala nga Procesi i Berlinit.
