Dua Lipa ka arritur një tjetër sukses historik në platformat e transmetimit, pasi albumi i saj debutues Dua Lipa ka kaluar shifrën e 15 miliardë dëgjimeve në Spotify.
Me këtë arritje, ajo bëhet gruaja e parë në histori që ka dy albume që kalojnë këtë prag, pas suksesit të jashtëzakonshëm të “Future Nostalgia”.
Ky rekord e vendos këngëtaren shqiptare përpara emrave të mëdhenj si Olivia Rodrigo dhe SZA, duke e bërë të vetmen artiste femër me më shumë se një album mbi 15 miliardë dëgjime.
Albumi debutues, i publikuar në vitin 2017, shënoi hyrjen e saj të fuqishme në skenën ndërkombëtare të pop-it, me hite si “Be the One”, “IDGAF” dhe “New Rules”, kjo e fundit duke arritur majat e klasifikimeve në Mbretërinë e Bashkuar dhe sukses global.
Versioni i zgjeruar “Complete Edition” i shtoi edhe më shumë vlerë projektit, duke përfshirë bashkëpunime të suksesshme si “One Kiss” me Calvin Harris dhe “Electricity” me Silk City.
Ky sukses i ri konfirmon jo vetëm ndikimin e madh të Dua Lipa në industrinë muzikore, por edhe fuqinë e katalogut të saj në epokën e streaming, duke e konsoliduar si një nga artistet më të mëdha të kohës.
