Pas më shumë se 20 vitesh nga debutimi, seria ikonike vizatimore “Winx Club” rikthehet në ekran me një format të ri dhe aventura të freskëta. Netflix ka konfirmuar se seriali i ri, i titulluar “The Magic Is Back”, do të nisë premierën më 2 tetor, duke zgjuar nostalgji tek fansat e dikurshëm dhe duke tërhequr brezin e ri.
Për ata që janë rritur me historitë e Bloom, Stella, Flora dhe shoqeve të tyre në Shkollën e Zanave Alfea, ky rikthim është një ftesë për t’u zhytur sërish në botën magjike të zanave dhe betejave epike mes së mirës dhe së keqes.
Seriali i ri do të realizohet në format CGI, duke i dhënë një pamje moderne personazheve, por pa humbur frymën e origjinalit të vitit 2004, i cili vazhdoi deri më 2019.
Ky projekt vjen pas dështimit të versionit live-action (Fate: The Winx Saga), i cili u anulua pas vetëm dy sezoneve. Këtë herë, Netflix premton t’i qëndrojë më besnik ADN-së së “Winx Club”, duke theksuar miqësinë, guximin dhe fuqinë e brendshme.
Një tjetër surprizë është edhe kënga e re e interpretuar nga Virginia Bocelli, vajza e tenorit të famshëm Andrea Bocelli, e cila do të shoqërojë premierën.
Edhe pse seria e kaluar u shoqërua me polemika rreth përfaqësimit të personazheve, “The Magic Is Back” synon të rikthejë shkëlqimin që e bëri “Winx Club” një fenomen global.
