Ajo ishte një nga këngëtaret më të talentuara dhe më të vlerësuara të kohës së saj. Amy Winehouse përveç se si këngëtare, ishte dhe një tekstshkruese shumë e mirë. Së fundmi, 800 sende personale të artistes së ndjerë, dolën në ankand dhe shumica e veshjeve të saj kishin një çmim prej 2,000 deri në 4,000 dollarë.
Ndërkaq, bëhet e ditur se fustani që Amy veshi në koncertin e saj të fundit u shit në ankand në Los Anxhelos për 243.200 dollarë, 16 herë më shumë se vlera e parashikuar. Këngëtarja kishte veshur fustanin ngjyrë bambuje jeshile dhe të zezë në performancën e saj të fundit, e cila u mbajt në Beograd në qershor 2011.
Shumë nga rrobat e tjera që këngëtarja legjendare veshi në shfaqje të ndryshme u shitën nga 12 500 deri në 150 000 dollarë. I gjithë koleksioni, i përbërë prej sendeve nga më të ndryshmet, nga të brendshmet te DVD-të, nga librat te grimi, kanë sjellë 4 milionë dollarë, dyfishi i shumës së parashikuar.
Të ardhurat do të shkojnë për Fondacionin ‘Amy Winehouse’, i cili mbështet të rinjtë vulnerabël që luftojnë me varësinë ndaj drogës dhe alkoolit. Ndërkaq, Amy Winehouse thuhet se ditët e fundit të jetës së saj i kaloi në mjerim. Të paktën kështu ka treguar Ian Halperin në librin e tij të ri “27 Heaven”. Teksa citonte një mikun e këngëtares së ndjerë, ai shkruante se ikona e muzikës ndihej e trishtuar para se të ndërronte jetë.
Rikujtojmë gjithashtu se babai i Amy Winehouse, ka shokuar fansat me deklaratën e tij. Mitch Winehouse ka zbuluar se shpirti i të bijës e ka vizituar 3 vite më parë. Teksa ka folur mbi vdekjen e këngëtares, Mitch ka treguar se vazhdon ta ndiejë ende prezencën e saj rrotull vetes. Gjithashtu është bërë publike dëshira më e madhe e këngëtares para se të ndahej përgjithmonë nga jeta. Amy dëshironte që të mund të kishte fëmijë.
