Në kujtim të këngëtarit të ndjerë Liam Payne, i cili humbi jetën tragjikisht tetorin e kaluar, janë mbledhur gati 290 mijë euro për të ndihmuar fëmijët që vuajnë nga kanceri.
Familja e artistit bëri një thirrje për donacione gjatë funeralit të tij në nëntor, dhe sipas raportimeve të “The Sun”, fondet do të shkojnë për financimin e një njësie të posaçme në spitalin “Great Ormond Street” në Londër.
Edhe pse në faqen e JustGiving shuma publike e donacioneve shfaqet rreth 39 mijë euro, totali i vërtetë ka arritur në afro 290 mijë euro falë kontributeve të shumta private.
Liz Tait, drejtoresha e mbledhjes së fondeve në spital, shprehu mirënjohjen për këtë gjest fisnik:
Jemi thellësisht të prekur nga bujaria e treguar në kujtim të Liamit. Çdo donacion na ndihmon të bëjmë një hap tjetër drejt krijimit të një qendre botërore për trajtimin e kancerit të fëmijëve. Është një trashëgimi e qëndrueshme që do të shpëtojë jetë dhe do të sjellë shpresë për brezat e ardhshëm.
Liam Payne, ish-anëtari i grupit të famshëm One Direction, ndërroi jetë në moshën 31-vjeçare më 16 tetor të vitit të kaluar, pas një rrëzimi tragjik në Buenos Aires.
Gjatë jetës së tij, Payne ishte i njohur për veprimtarinë humanitare dhe shpesh kontribuonte për fëmijët në nevojë – në një rast, ai kishte dhuruar mbi 11 mijë euro brenda një nate për organizata bamirësie.
