Ndërsa Lamine Yamal festoi triumfin historik të Spanjës në finalen e Kupës së Botës, një tjetër anëtar i familjes së tij arriti të fitojë zemrat e miliona tifozëve në mbarë botën.
Bëhet fjalë për Keyne, vëllain vetëm trevjeçar të futbollistit, i cili u shndërrua në një nga personazhet më të komentuar të festimeve pas finales.
I veshur me fanellën e kombëtares spanjolle, vogëlushi ndoqi ndeshjen nga tribunat, ndërsa sapo arbitri dha vërshëllimën e fundit, ai zbriti në fushë dhe vrapoi drejt Lamine Yamal, duke e përqafuar mes emocionesh pas fitimit të trofeut.
Pamjet e këtij momenti prekës u përhapën me shpejtësi në rrjetet sociale, ku mijëra tifozë e cilësuan Keynen si “yllin e vërtetë” të festimeve.
Festimet nuk përfunduan me kaq. Vogëlushi u pa duke pozuar pranë vëllait të tij dhe trofeut të Kupës së Botës, ndërsa me natyrshmërinë e tij bëri edhe disa gjeste lozonjare para kamerave, duke sjellë buzëqeshje te të gjithë të pranishmit.
Keyne vazhdoi të shijonte atmosferën festive duke vrapuar në fushë dhe duke luajtur me futbollistin Nico Williams, ndërsa një tjetër moment që u bë viral ishte përshëndetja e ngrohtë që mori nga një polic amerikan, i cili nuk i fshehu buzëqeshjen përballë energjisë së vogëlushit.
Përtej suksesit në fushë, Lamine Yamal ka folur shpesh për lidhjen e fortë me familjen e tij. Futbollisti ka theksuar se lumturia e nënës dhe e vëllait të vogël është motivimi më i madh në jetën dhe karrierën e tij.
Dhe pikërisht në natën më të rëndësishme të karrierës së tij, ishte përqafimi i vogëlushit Keyne ai që i dha festës një nga momentet më të bukura dhe më emocionuese të finales së Kupës së Botës.
