Këngëtari legjendar spanjoll Julio Iglesias, 82 vjeç, është përfshirë në një skandal të rëndë, pasi dy ish-punonjëse femra e akuzojnë për sulm seksual dhe trafikim njerëzor gjatë kohës që punonin në rezidencat e tij luksoze në Karaibe, Republikën Domenikane dhe Bahamas.
Sipas një hetimi të përbashkët të mediave elDiario.es dhe Univision Noticias, incidentet e pretenduara kanë ndodhur në vitin 2021.
Gratë, të identifikuara me pseudonimet Rebecca dhe Laura, deklarojnë se Iglesias i ka prekur në mënyrë seksuale pa pëlqimin e tyre, shpesh edhe në prani të punonjësve të tjerë, duke krijuar një ambient frike, presioni dhe kontrolli.
Rebecca ka deklaruar se ndihej si “objekt” dhe “skllave”, ndërsa Laura ka përshkruar episode pranë plazhit dhe pishinës, ku thotë se këngëtari e ka prekur kundër vullnetit të saj.
Sipas raportimeve, të dyja gratë kanë dorëzuar kallëzim zyrtar pranë prokurorisë në Spanjë.
Hetimi trevjeçar mbështetet në dëshmitë e 15 ish-punonjësve, si edhe në prova dokumentare që përfshijnë fotografi, mesazhe në WhatsApp dhe raporte mjekësore.
Megjithatë, disa ish-punonjëse të tjera i kanë mohuar akuzat, duke e përshkruar Iglesiasin si një njeri bujar dhe korrekt.
Deri tani, Julio Iglesias dhe avokati i tij nuk kanë reaguar publikisht. Ndërkohë, këngëtari është mbrojtur edhe nga presidentja e Komunitetit të Madridit, Isabel Díaz Ayuso, e cila e ka cilësuar publikimin e lajmit si një përpjekje për diskreditim.
Hetimet vijojnë në Audiencia Nacional të Spanjës, ndërsa rasti ka rikthyer vëmendjen te akuzat për ngacmim seksual dhe keqpërdorim të punonjësve në ambiente private të lidhura me luksin dhe izolimin ekstrem.
