Reforma Zgjedhore është sot në fokus të axhendës së takimeve të ambasadores amerikane, Yuri Kim me zyrtarë shqiptarë. Pak minuta më parë, Kim u largua nga zyra e kryeparlamentarit Gramoz Ruçi, ndërsa më herët gjatë ditës takoi kreun e Komisionit të Ligjeve, Ulsi Manja. Gjithashtu, bashkë me ambasadorin e BE-së, Luigi Soreca, pritet që diplomatja e Uashingtonit të ketë një takim me 4 përfaqësuesit e Këshillit Politik të Reformës Zgjedhore.
Ndërkaq, Këshilli Politik i Reformës Zgjedhore mblidhet sot në orën 17:00. Palët pritet të diskutojnë masat që rregullojnë veprimtarinë e Prokurorisë, Policisë, SPAK-ut, si dhe do të trajtohet krimi zgjedhor. 2 ditë më parë, gjetën konsensus për kufizimin e periudhës zgjedhore në 15 prill-15 maj dhe 15 tetori-15 nëntor, parimin e kuotës gjinore e financimin për partitë.
Ambasadori i OSBE-së, Bernd Borchardt kërkon që partitë politike në Këshillin e Reformës Zgjedhore të vijojnë rrugën e kompromisëve konstruktive. “Prezenca e OSBE-së në Shqipëri dhe ODIHR-i do të vijojnë të ofrojnë mbështetje për përmbylljen e kësaj reforme të rëndësishme sa më shpejt, idealisht brenda 31 majit, sikurse janë zotuar partitë politike. Po ashtu, ne do të vijojmë të mbështesim dialogun për teknologjitë e reja të votimit dhe për ndryshimin e sistemit zgjedhor”, thuhet në deklaratën e ambasadorit Borchardt.
