Botoxi mbetet një nga trajtimet estetike më të përdorura në botë, por shumë persona që e kanë provuar, ose po mendojnë ta bëjnë, pyesin me ankth: “Po nëse e ndal një ditë, a prishet fytyra?” Dermatologët dhe kirurgët plastikë shpjegojnë se çfarë ndodh realisht kur nuk rinovoni më injeksionet.
Efekti i botox-it është i përkohshëm
Veprimi i botox-it zgjat rreth 3 deri në 6 muaj. Pas kësaj periudhe, muskujt e fytyrës rifitojnë lëvizshmërinë e tyre normale dhe shprehjet rikthehen gradualisht, ashtu siç ishin përpara trajtimit.
Rrudhat nuk bëhen më të thella, vetëm rikthehen
Një nga frikërat më të zakonshme është se pasi e lë botoxin, rrudhat bëhen më keq. Specialistët theksojnë se, në përgjithësi, rrudhat rikthehen në gjendjen e mëparshme. Ato mund të duken më të theksuara vetëm sepse jeni mësuar ta shihni fytyrën shumë të lëmuar për disa muaj me radhë.
Pse fytyra mund të duket “më e lodhur” në fillim?
Me rikthimin e lëvizjeve normale të muskujve, fytyra bëhet më ekspresive. Në këtë fazë tranzicioni, disa persona kanë përshtypjen se duken më të lodhur ose më të mërzitur, por kjo është e përkohshme dhe thjesht çështje ambientimi me shprehjet natyrale.
Nuk shkakton rënie të lëkurës
Një tjetër mit i përhapur është ideja se ndalimi i botox-it bën që lëkura të “bjerë” ose të dobësohet. Mjekët shpjegojnë se botoxi vepron mbi muskujt që shkaktojnë rrudha mimike, jo mbi strukturën e lëkurës. Elasticiteti dhe tonusi i lëkurës nuk dëmtohen vetëm sepse keni ndaluar trajtimin.
Muskujt rifitojnë gradualisht forcën e tyre
Me kalimin e muajve, muskujt kthehen në aktivitetin e dikurshëm dhe fytyra fiton sërish shprehjet e veta origjinale. Procesi është gradual, jo i menjëhershëm, ndaj nuk ka ndryshime të befta e dramatike.
Një “bonus” i papritur, rrudhat mund të duken më të buta?
Te personat që kanë përdorur botox për një periudhë më të gjatë, muskujt janë mësuar të mos kontraktohen aq fort. Si pasojë, edhe pasi ndalet trajtimi, rrudhat dinamike mund të mbeten disi më pak të theksuara se më parë.
A ka arsye për panik?
Sipas specialistëve, jo. Ndalimi i botox-it nuk e shkatërron fytyrën dhe nuk sjell pasoja të rënda estetike. Thjesht i riktheheni versionit tuaj natyral, me shprehjet dhe rrudhat që do të kishit normalisht në atë moshë, pa ndërhyrje.
