Një studim i fundit ka zbuluar se gratë që kanë qenë viktima të dhunës në familje përballen me një rrezik të lartë për dëmtime traumatike të trurit dhe çrregullime të shëndetit mendor që mund të zgjasin me dekada, edhe pasi abuzimi ka përfunduar.
Sipas kërkimeve të publikuara nga Universiteti i Glasgout në revistën “BMJ Mental Health”, studimi i titulluar “Dhuna nga partneri intim, dëmtimi traumatik i trurit dhe rezultatet afatgjata të shëndetit mendor në moshën e mesme: Studimi Drake IPV”, analizoi të dhënat e 632 personave të moshës 40-59 vjeç.
Prej tyre, 14% raportuan se kishin përjetuar dhunë fizike nga partneri intim.
Rezultatet treguan se këta persona ishin më të predispozuar për të zhvilluar trauma të trurit (TBI), çrregullim post-traumatik (PTSD), depresion, ankth dhe probleme të gjumit.
Ajo që është edhe më shqetësuese, sipas studiuesve, është fakti se pas një periudhe mesatare prej 27 vitesh nga ekspozimi ndaj abuzimit, rreziku për probleme të shëndetit mendor vazhdonte të mbetej i lartë.
Shumica e grave që kishin përjetuar dhunë raportuan goditje të përsëritura në kokë dhe lëndime të trurit, që ndërlidhen ngushtë me pasoja afatgjata psikologjike dhe emocionale.
Studiuesit theksojnë se ky është një alarm i fortë për nevojën urgjente për më shumë kërkime dhe ndërhyrje të synuara, me qëllim rritjen e ndërgjegjësimit midis profesionistëve të shëndetësisë dhe politikëbërësve për pasojat serioze dhe afatgjata të dhunës në familje ndaj shëndetit të trurit dhe mirëqenies psikologjike të viktimave.
Në një kohë kur një në tre gra në botë përjeton dhunë në familje, ky studim nënvizon nevojën për më shumë mbështetje, trajtim dhe ndërhyrje në kohë për të parandaluar pasoja të rënda dhe të zgjatura.
