Një debat i fortë ka shpërthyer mes DJ Gimbo-s dhe banorit të “Big Brother VIP Albania”, Rogert, pas një pyetjeje që ky i fundit adresoi publikisht në lidhje me ndarjen tragjike nga jeta të vëllait të mitur të Gjestit.
Situata u ndez gjatë një bisede brenda shtëpisë, kur Rogerti ngriti pikëpyetje mbi rrethanat e ngjarjes, duke shkaktuar reagime të shumta dhe indinjatë në rrjetet sociale.
Pyetja u konsiderua nga shumë ndjekës si e papërshtatshme, për shkak të ndjeshmërisë së temës dhe faktit se bëhet fjalë për humbjen e një fëmije vetëm 15 vjeç.
Pas kësaj, DJ Gimbo reagoi ashpër në publik, duke e cilësuar veprimin e Rogertit si të pashpirt dhe pa ndjeshmëri njerëzore. Ai theksoi se fatkeqësitë familjare nuk mund dhe nuk duhet të kthehen në tema diskutimi apo spektakli përpara kamerave.
Nuk mund të luash me dhimbjen e një familjeje dhe ta përdorësh si material për vëmendje
-u shpreh DJ Gimbo, duke shtuar se ka kufij moralë që nuk duhen kapërcyer, pavarësisht formatit të lojës apo presionit mediatik.
Deklaratat e tij janë shpërndarë gjerësisht në rrjetet sociale, ku shumica e ndjekësve i kanë dalë në mbështetje, duke theksuar se tema të tilla kërkojnë respekt, ndjeshmëri dhe heshtje, jo spekulime publike apo pyetje provokuese.
