Koreja e Jugut do të mbajë zgjedhje të parakohshme presidenciale më 3 qershor, për të zëvendësuar presidentin e rrëzuar Yoon Suk Yeol. Lajmi u konfirmua të martën nga udhëheqësi në detyrë i vendit, Han Duck-soo.
Vendimi për zhvillimin e zgjedhjeve vjen pas vendimit historik të Gjykatës Kushtetuese, e cila rrëzoi presidentin Yoon nga detyra, për shkak të vendosjes së ligjit ushtarak në dhjetor – një lëvizje që u cilësua e gabuar dhe antikushtetuese.
Sipas legjislacionit korean, një president i ri duhet të zgjidhet brenda 60 ditëve nga rrëzimi i kreut të shtetit.
Zgjedhjet pritet të zhvillohen në një klimë të ashpër politike, e ndikuar nga polarizimi i thellë mes dy forcave kryesore: Partisë Konservatore të Pushtetit Popullor të Yoon dhe Partisë Demokratike opozitare liberale.
Partia e Pushtetit Popullor përballet me një betejë të vështirë për të ruajtur pushtetin, teksa përpiqet të rikthejë besimin e publikut dhe të shërojë përçarjet e thella të brendshme, të shkaktuara nga manovrat e diskutueshme të Yoon-it për shpalljen e ligjit ushtarak.
Partitë politike në Korenë e Jugut pritet të nisin së shpejti procesin e zgjedhjeve paraprake për të përzgjedhur kandidatët e tyre presidencialë.
Nga kampi i Partisë Demokratike, kandidati kryesor dhe më i mundshëm mbetet Lee Jae-myung.
Gjykata Kushtetuese e Koresë së Jugut mbajti në fuqi vendimin për shkarkimin e presidentit Yoon Suk Yeol, për shkak të shpalljes së gjendjes së luftës, duke e larguar atë nga posti dhe duke i hapur rrugë zgjedhjeve të reja pas muajve të trazirave politike. 64 vjeçari u shkarkua nga ligjvënësit për përpjekjen e tij më 3 dhjetor 2024, për të përmbysur sundimin civil, duke dislokuar ushtarë të armatosur në parlament. Në një çështje të ndarë penale, u arrestua nën akuzat për kryengritje.
Miliona qytetarë në Korenë e Jugut ndoqën vendimin e Gjykatës Kushtetuese që u transmetua drejtpërdrejt nga mediat.
Duke pasur parasysh ndikimin negativ dhe pasojat e mëdha të shkeljeve kushtetuese nga ana e të paditurit… Ne e shkarkojmë presidentin Yoon Suk Yeol, deklaroi ushtruesi i detyrës të kryetarit të Gjykatës Kushtetuese, Moon Hyung-bae kur lexoi vendimin.
Gjykata e argumentoi vendimin duke theksuar se me veprimet e tij, Yoon “shkeli parimet themelore të sundimit të ligjit dhe qeverisjes demokratike”.
