Leonardo DiCaprio mund të bëhet pjesë e vazhdimit të një prej filmave më të njohur të zhanrit “crime-thriller”, “Heat”, që u publikua për herë të parë në vitin 1995 me protagonistë Al Pacino, Robert De Niro dhe Val Kilmer.
Sipas raportimeve të “The Hollywood Reporter”, aktori fitues i Oscar-it është në bisedime me regjisorin Michael Mann për të marrë një nga rolet kryesore në “Heat 2”, i cili do të funksionojë si njëkohësisht vazhdim dhe parathënie e historisë origjinale.
Projekti po zhvillohet nën kujdesin e “United Artists”, degë e “Amazon MGM Studios”, pasi “Warner Bros”, thuhet se nuk arriti një marrëveshje për buxhetin me regjisorin Mann.
Producentët e filmit do të jenë Jerry Bruckheimer dhe Scott Stamper, ndërsa Mann do të rikthehet pas kamerës pas më shumë se 25 vitesh nga realizimi i filmit që u bë një klasik modern i kinemasë.
Sipas “Deadline”, DiCaprio po shqyrton mundësinë për të interpretuar rolin e Chris Shiherlis, personazhin që në versionin origjinal luhej nga Val Kilmer — një nga bashkëpunëtorët më të afërt të Neil McCauley (Robert De Niro), të përfshirë në grabitjen famëkeqe që përbën zemrën e historisë.
Megjithatë, burime pranë projektit theksojnë se bisedimet janë ende në fazat e hershme dhe nuk është bërë ende asnjë ofertë zyrtare për aktorin.
Vetë Michael Mann, gjatë pjesëmarrjes në Festivalin e Filmit në Busan, deklaroi se planifikon të nisë xhirimet në vitin 2026, ndërsa aktualisht ndodhen në procesin e buxhetimit, planifikimit dhe përzgjedhjes së kastit.
Nëse marrëveshja me DiCaprion finalizohet, “Heat 2” pritet të jetë një nga projektet më të mëdha të kinemasë amerikane në vitet e ardhshme, duke bashkuar sërish një regji ikonike me një kast yjesh të kalibrit të lartë.
Filmi origjinal “Heat” mbetet një nga veprat më të vlerësuara të Michael Mann, i njohur për realizmin urban, tensionin dramatik dhe përplasjen legjendare mes Pacino dhe De Niro.
