Pas më shumë se tre dekadash spekulimesh dhe teorish nga fansat, Macaulay Culkin ka vendosur t’i japë fund një prej mistereve më të mëdha të filmit kult “I vetëm në shtëpi”: si e përballonte familja McCallister jetën e tyre luksoze?
Në një intervistë të fundit, aktori 45-vjeçar ka ndarë mendimin e tij mbi profesionet e Peter dhe Kate McCallister, prindërit e Kevinit, duke hedhur dritë mbi pyetjen që ka ndjekur filmin që nga viti 1990.
Që nga publikimi i “Home Alone”, fansat janë habitur nga fakti se familja jetonte në një vilë gjigante në periferi të Çikagos, organizonte udhëtime familjare drejt Parisit për Krishtlindje dhe strehonte plot 15 persona nën një çati.
Kjo ka nxitur teori të shumta, madje edhe spekulime konspirative për burimin e pasurisë së tyre.
Sipas Culkin, shpjegimi është shumë më i thjeshtë nga sa mendohej.
Mendoj se babai i Kevinit ishte avokat korporatash, prandaj ata mund të përballonin një jetë kaq të mirë dhe të jetonin në një lagje elitare
-u shpreh ai.
Ndërsa për nënën, aktori shtoi:
Ajo ishte dizajnere e brendshme, prandaj shtëpia dukej aq e bukur dhe elegante.
Këto hamendësime përkojnë edhe me deklaratat e regjisorit Chris Columbus, i cili në dhjetor 2024 zbuloi se ai dhe skenaristi legjendar John Hughes kishin diskutuar prapaskenat e personazheve.
Sipas Columbus, nëna e Kevinit ishte menduar si një stiliste shumë e suksesshme mode, ndërsa babai mund të kishte punuar në reklama, bazuar në përvojën personale të Hughes.
Pas 35 vitesh, duket se misteri më i famshëm i Krishtlindjeve më në fund ka marrë një përgjigje, dhe fansat e “I vetëm në shtëpi” kanë një arsye më shumë për ta parë filmin me sy të rinj.
