Justin Bieber ka bërë një reagim të fortë dhe emocional ndaj industrisë së muzikës, duke deklaruar se për vite me radhë është trajtuar si një “produkt” dhe jo si njeri. Këngëtari, i cili u bë i famshëm që në moshën 13-vjeçare, ka ndarë për herë të parë publikisht plagët e padukshme që, sipas tij, i la fama e hershme.
Në një postim të sinqertë në Instagram, Bieber foli për anën e errët të suksesit global, duke kujtuar se u rrit brenda një sistemi që shpërblente talentin e tij, por nuk e mbrojti shpirtin.
Kishte momente kur ndihesha i shfrytëzuar, i nxituar dhe i formuar në diçka që nuk e kisha zgjedhur vetë
-shkroi ai.
Ylli kanadez, i zbuluar në YouTube nga Scooter Braun dhe i kthyer në fenomen botëror me hitin “Baby”, pranoi se presioni i vazhdueshëm i famës i la pasoja të rënda në shëndetin e tij mendor, duke e çuar drejt varësive dhe betejave të brendshme. Megjithatë, ai theksoi se besimi e ndihmoi të gjente paqe dhe të shërohej.
Sot nuk flas si një viktimë, por si dikush që është rikuperuar
–tha Bieber, duke shtuar se nuk kërkon hakmarrje ndaj industrisë, por transformim.
Nuk dua ta shkatërroj industrinë. Dua që ajo të ndryshojë
Në fund të mesazhit, këngëtari u shpreh qartë:
Nuk jam një produkt. Nuk jam ajo që kërkonte industria. Unë jam një bir
-një deklaratë që ka prekur miliona fansa dhe ka ndezur debat të gjerë mbi mënyrën se si trajtohen artistët e rinj në industrinë e muzikës.
