Ndarja romantike nuk është vetëm një përvojë emocionale, por edhe një tronditje reale fizike për trupin. Shkenca ka treguar se dhimbja e zemrës aktivizon të njëjtat zona të trurit që përfshihen në dhimbjen fizike.
Një studim i publikuar nga “University of Michigan” dhe “Proceedings of the National Academy of Sciences” zbuloi se refuzimi romantik stimulon korteksin cingular anterior, zonë që lidhet drejtpërdrejt me ndjesinë e dhimbjes fizike.
Kjo shpjegon pse ndarja shoqërohet me simptoma si shtrëngim në gjoks, lodhje ekstreme, humbje oreksi apo pagjumësi.
Gjithashtu, pas ndarjes, niveli i dopaminës bie ndjeshëm, duke krijuar një efekt të ngjashëm me abstinencën nga një substancë varësie. Truri kërkon “dozën” e lidhjes emocionale që nuk ekziston më.
Psikologët theksojnë se kjo fazë është e përkohshme, por kërkon kohë dhe përkujdesje.
Mbështetja sociale, aktiviteti fizik dhe kufizimi i kontaktit me ish-partnerin ndihmojnë trurin të krijojë rrugë të reja emocionale.
Shërimi nga ndarja nuk është dobësi, por një proces biologjik dhe emocional që kërkon durim.
