Shumë njerëz përballen me një ndjesi ankthi që bëhet më e fortë gjatë orëve të natës. Mendimet negative, shqetësimet për të ardhmen apo ndjesia e pasigurisë duket se intensifikohen sapo bie qetësia dhe rutina e ditës përfundon. Sipas specialistëve të shëndetit mendor, kjo është një dukuri e zakonshme dhe lidhet me disa faktorë psikologjikë dhe biologjikë.
Gjatë ditës, truri është i angazhuar me punë, komunikim dhe aktivitete të ndryshme, çka e shpërqendron vëmendjen nga mendimet stresuese. Ndërsa në mbrëmje, kur ambienti bëhet më i qetë dhe njeriu mbetet vetëm me mendimet e tij, ankthi mund të dalë më në pah. Ekspertët shpjegojnë se lodhja fizike dhe mendore e akumuluar gjatë ditës e bën organizmin më të ndjeshëm ndaj emocioneve negative.
Një tjetër faktor lidhet me ritmin biologjik të trupit. Në orët e vona, niveli i kortizolit (hormoni që ndihmon trupin të përballojë stresin) ndryshon, ndërsa mungesa e gjumit ose pagjumësia mund të ndikojë drejtpërdrejt në rritjen e ankthit. Edhe përdorimi i tepërt i telefonit apo rrjeteve sociale para gjumit konsiderohet një element që stimulon mendjen dhe vështirëson relaksimin.
Psikologët rekomandojnë krijimin e një rutine të qetë para gjumit, shmangien e ekraneve elektronike dhe praktikimin e teknikave relaksuese si frymëmarrja e thellë apo meditimi. Në rastet kur ankthi bëhet i vazhdueshëm dhe ndikon në jetën e përditshme, këshillohet konsultimi me një specialist të shëndetit mendor.
