Drejtori i fabrikës Grünheide të Tesla, Andre Thierig, tha se fabrika aktualisht furnizon 37 tregje, kryesisht në Evropë, por edhe në Lindjen e Mesme dhe Tajvan. Ai i tha agjencisë së lajmeve Dpa se e sheh fabrikën e vetme evropiane të Teslës si një “shembull të ndritshëm në industrinë e automobilave”. Tregoi se makinat elektrike mund të prodhohen me sukses në Gjermani. Shitjet e makinave elektrike në Gjermani ranë sërish në nëntor, sipas të dhënave nga Administrata Federale e Automjeteve. Pothuajse 35.200 automjete të reja elektrike janë regjistruar gjatë muajit të parafundit të vitit, përfshirë 2.200 automjete Tesla. Numri i përgjithshëm i regjistrimeve është ulur me 22 për qind krahasuar me nëntorin e kaluar.
Tesla, në pronësi të miliarderit Elon Musk, dëshiron të dyfishojë prodhimin në fabrikën Grünheide nga 500,000 makina të planifikuara në vit në një milion në vit. “Ne jemi optimistë për të ardhmen”-tha Thierig. Edhe pse prodhuesi amerikan ka marrë dritën jeshile nga shteti federal i Brandenburgut për hapin e parë, planet e zgjerimit aktualisht janë pezull për shkak të situatës së vështirë të tregut.
Që nga fillimi i vitit, Tesla është përballur me sfida, me prodhimin e ndërprerë për rreth dy javë në janar dhe shkurt për shkak të mungesës së pjesëve të shkaktuara nga sulmet e Houthi jemenas, ndaj anijeve në Detin e Kuq. Përveç kësaj, ajo po përballet me një numër në rritje të protestave të aktivistëve mjedisorë, disa prej të cilëve janë duke kampuar në pyllin jo shumë larg fabrikës, duke u përpjekur të parandalojnë zgjerimin e fabrikës.
Tesla ka tërhequr pothuajse 700,000 automjete elektrike për shkak të një problemi me dritën paralajmëruese në sistemin e monitorimit të presionit të gomave. Drita paralajmëruese mund të mos qëndrojë e ndezur ndërmjet cikleve të drejtimit, duke mos paralajmëruar shoferin për presionin e ulët të gomave dhe duke rritur rrezikun e një përplasjeje, sipas prodhuesit. Bëhet e ditur se tërheqja prek disa automjete Model 3, Model Y dhe Cybertruck.
Ndërsa defekti do të zgjidhet përmes një përditësimi të softuerit falas. Ndryshe, Tesla ka njoftuar disa tërheqje gjatë gjithë vitit. Kompania e Elon Musk tërhoqi 1.8 milionë automjete në korrik për shkak të një problemi që mund të rriste rrezikun e një aksidenti. Në shkurt kompania tërhoqi afro 2.2 milionë automjete në SHBA sepse disa drita paralajmëruese në panelin e instrumenteve ishin shumë të vogla. Cybertruck është tërhequr shtatë herë, me një tërheqje muajin e kaluar që përfshinte rreth 2,400 automjete.
