Kur njerëzit flasin për traumën, zakonisht përmendin një aksident, një humbje apo një ngjarje të rëndë. Por sipas mjekut dhe autorit Gabor Maté, trauma nuk është vetë ngjarja, por ajo që ndodh brenda njeriut si pasojë e saj.
Në librat dhe leksionet e tij, Maté argumenton se dy persona mund të përjetojnë të njëjtën situatë, por të mos zhvillojnë të njëjtën traumë. Arsyeja lidhet me mënyrën se si sistemi nervor e përpunon përvojën dhe me nivelin e mbështetjes emocionale që individi ka pasur në atë moment.
Sipas tij, shumë plagë emocionale nuk krijohen vetëm nga ajo që na është bërë, por edhe nga ajo që na ka munguar. Një fëmijë mund të mos ketë përjetuar dhunë fizike, por të jetë rritur pa u ndier i dëgjuar, i kuptuar apo emocionalisht i sigurt.
Eksperti shpjegon se, në raste të tilla, truri zhvillon mekanizma mbrojtës për të mbijetuar. Fëmija mund të mësojë të shtypë emocionet, të mos kërkojë ndihmë ose të përpiqet vazhdimisht të kënaqë të tjerët për të mos humbur dashurinë.
Maté thekson se këto mekanizma janë inteligjentë gjatë fëmijërisë, por mund të bëhen pengesë në jetën e rritur, duke ndikuar në marrëdhënie, vetëvlerësim dhe shëndetin mendor.
Mesazhi i tij kryesor është se trauma nuk është identiteti i njeriut. Duke kuptuar plagën dhe jo vetëm simptomat, sipas tij, fillon edhe procesi i shërimit.
