Selena Gomez ka zgjedhur sërish sinqeritetin përballë fansave, duke zbuluar arsyen pse zëri i saj ka ndryshuar ndër vite. Gjatë një Instagram Live të zhvilluar të martën, këngëtarja iu përgjigj drejtpërdrejt një pyetjeje që kishte ngjallur kureshtje prej kohësh, duke theksuar se nuk ndihet aspak e ofenduar nga interesi i publikut.
Sinqerisht, ndonjëherë gjërat thjesht ndodhin. Trupi im reagon çuditshëm. Fyti më enjtet nga brenda herë pas here, kaq është
-u shpreh artistja, duke folur me qetësi dhe transparencë për ndryshimet që ka përjetuar.
Selena theksoi se e vlerëson hapjen e fansave dhe faktin që ata ndihen të lirë të pyesin, duke shtuar se preferon gjithmonë realitetin ndaj spekulimeve.
Ky rrëfim lidhet drejtpërdrejt me betejën e saj shumëvjeçare me lupusin, një sëmundje autoimune kronike që shkakton inflamacion në trup dhe mund të ndikojë edhe në vokal.
Këngëtarja e zbuloi për herë të parë diagnozën në vitin 2015, duke treguar se kishte kaluar trajtime të vështira, përfshirë edhe kimioterapinë, dhe ishte tërhequr për një periudhë nga jeta publike për t’u rikthyer më e fortë.
Ndikimi i trajtimeve është reflektuar edhe në peshën e saj, duke e kthyer shpesh në shënjestër të kritikave në rrjet. Megjithatë, Selena ka pranuar se ndonëse komentet e kanë lënduar, ato nuk e kanë thyer.
Sot, ajo vazhdon të flasë hapur për shëndetin, jetën personale dhe sfidat që ka kaluar, duke theksuar se dëshiron ta tregojë historinë e saj pa filtra dhe pa justifikime, me zërin e saj të vërtetë.
