Autoriteti i Dosjeve hapi letrat në Kuvend dhe zbuloi se ish-bashkëpunëtorë të shtetit rezultojnë të jenë ulur në karrigen e deputetit, legjislaturën e shkuar. Kryetarja Gentiana Sula:
Pyeti për Parlamentin e mëparshëm, sa persona janë me dokumenta dhe ne bëmë verifikimin, e legjitimuam si kërkesë dhe i thamë: atëherë kishte pesë perona me çështje, por që nuk ishin verifikuar.
Nga 140 deputetë të Parlamentit aktual, vetëm 10 ligjvënës kanë guxuar të verifikojnë të shkuarën e tyre. Për të spastruar politikën nga ish bashkëpunëtorët e Sigurimit të Shtetit, kryetarja e Autoritetit të Dosjeve, Gentiana Sula kërkoi ndërhyrje në Reformën Zgjedhore.
Kreu i grupit demokrat, Enkelejd Alibeaj:
Sa deputetë të këtij Parlamenti, të zgjedhur vjet rishtas, kanë kërkuar tek ju verifikim të figurës?
Skënder Vrioni nga Autoriteti i Dosjeve deklaroi:
Numërohen me gishtat e dorës, jo më shumë se 10. Një ndër ta që kanë kërkuar është dhe vetë zoti Alibeaj, i cili doli figurë e pastër.
Kryetarja Gentiana Sula:
Ne kemi propozuar që për shembull, të bëhet një vetëdeklarim, njerëzit të vetëdeklarohen dhe më pas t’i lihet kohë institucionit të bëjë verifikimet sepse partitë vetë nuk e kanë kërkuar këtë gjë dhe është mëkat! Neve nuk e bëjmë dot kryesisht, sepse ligji thotë: me kërkesë, kështu që këtu, i kemi pak a shumë, duart e lidhura.
Përgjatë vitit 2021, Autoriteti i Dosjeve ka verifikuar 2 mijë e 189 kandidatë përpara emërimit, ngritjes në detyrë apo fazës për t’u zgjedhur deputetë dhe kryetarë bashkie. 71 prej tyre kanë rezultuar të kenë implikime të ndryshme. Rrjeta e verifikimit ka peshkuar ish-sigurimsat, më së shumti mes njerëzve të drejtësisë dhe në polici, ku në grupin e parë rezultojnë me dosje 13 persona ndërsa në polici gjashtë.
