Bebe Rexha ka shënuar një tjetër arritje të rëndësishme në karrierën e saj, duke u renditur në vendin e parë në The UK’s Biggest Chart Show me këngën e saj më të fundit “New Religion”.
Artistja shqiptaro-amerikane u shpall fituese nga Big Top 40, ndërsa reagimi i saj i emocionuar gjatë një interviste nga distanca u shpërnda nga organizatorët dhe u prit me entuziazëm nga fansat.
Sipas njoftimit zyrtar, gara për kreun e listës këtë javë ka qenë veçanërisht e fortë, me publikime të reja nga emra të njohur të industrisë muzikore.
Në mesin e konkurrentëve në Top 10 ishin edhe BTS, si dhe këngëtaret RAYE dhe SIENNA SPIRO.
Lista përfshinte gjithashtu hyrje të reja si “Loving Life Again” nga Ella Langley dhe “You’re A Superstar” nga Take That, duke e bërë edhe më të fortë konkurrencën.
Kënga “New Religion” është pjesë e albumit të ri të Rexhës, “Dirty Blonde”, i cili pritet të publikohet i plotë më 12 qershor.
Ky sukses i fundit konsiderohet një shtysë e madhe për projektin e saj më të ri, i cili tashmë ka nisur të tërheqë vëmendjen e publikut ndërkombëtar.
Me këtë arritje, Bebe Rexha konfirmon edhe një herë pozicionin e saj në skenën globale të muzikës pop.
