Një studim i fundit ka zbuluar një lidhje shqetësuese mes zakonit të të shikuarit të përmbajtjeve digjitale gjatë vakteve dhe shfaqjes së shenjave të depresionit.
Sipas hulumtimit, personat që shohin rregullisht video në YouTube, seriale apo përmbajtje në TikTok teksa hanë, kanë deri në tre herë më shumë gjasa të përjetojnë simptoma depresive.
Ekspertët theksojnë se kjo sjellje mund të jetë një mekanizëm i pavetëdijshëm për shmangien e ndjenjave apo mendimeve të brendshme.
Në vend që individi të jetë i pranishëm në momentin e ngrënies apo të lidhet me njerëzit përreth, ai i drejtohet ekranit si një formë mbështetjeje emocionale.
Me kalimin e kohës, kjo tendencë jo vetëm që mund të ndikojë në gjendjen emocionale, por edhe në mënyrën se si trupi dhe truri e perceptojnë ushqimin — jo më si një burim kënaqësie, sigurie apo lidhjeje, por si një boshllëk që duhet mbushur me stimuj vizualë.
Sipas psikologëve, ky zakon që shpesh shihet si i pafajshëm, mund të jetë një tregues i thellë se dikush po shmang ballafaqimin me vetveten apo me realitetin përreth.
Specialistët rekomandojnë ndërgjegjësimin gjatë vakteve, përfshirë ngrënien pa pajisje elektronike, si një hap drejt rritjes së mirëqenies mendore dhe emocionale.
