Ndërsa ndërgjegjësimi për rëndësinë e shëndetit mendor është rritur ndjeshëm, gjithnjë e më shumë njerëz po kërkojnë ndihmë profesionale për të përballuar sfidat e përditshme. Një kategori që shpesh hesht, por që gjithsesi kërkon ndihmë, janë burrat – veçanërisht për çështjet që lidhen me marrëdhëniet dhe martesën.
Ekspertë të shëndetit mendor tregojnë se burrat ndajnë në heshtje një sërë shqetësimesh në terapitë psikologjike, që shpesh nuk i shprehin hapur në jetën e përditshme. Ankesat më të zakonshme që burrat ndajnë në terapi:
Kritikat e vazhdueshme nga partnerja
Një ndër shqetësimet më të zakonshme që ata ndajnë është ndjenja se po kritikohen vazhdimisht nga partnerja e tyre – qoftë për stilin e jetesës, zgjedhjet, apo sjelljen. Kjo krijon ndjesi përçmimi dhe lodhjeje emocionale.
Ekspertët theksojnë se, edhe kur përpiqen të ndryshojnë, burrat shpesh nuk ndihen të vlerësuar, pasi çdo përpjekje pasohet nga një kritikë tjetër.
Terapia mund të ndihmojë çiftet të kalojnë nga kritika te vlerësimi dhe komunikimi konstruktiv.
Gjykimi i padrejtë i zgjedhjeve personale
Shumë burra ndihen të nënvlerësuar dhe të gjykuar për zgjedhjet që bëjnë, qoftë në karrierë apo mënyrën si menaxhojnë përditshmërinë.
Kjo gjendje ndikon drejtpërdrejt në ndjenjën e vetëvlerësimit. Psikologët rekomandojnë që partnerët të mësojnë të pyesin dhe të kuptojnë motivet e njëri-tjetrit përpara se të nxjerrin përfundime.
Mungesa e intimitetit
Një tjetër temë delikate që burrat ndajnë në terapi është mungesa e intimitetit. Ndryshe nga gratë, të cilat e përjetojnë intimitetin si një lidhje emocionale që mund të përfshijë aspektin fizik, burrat e lidhin shpesh këtë afërsi me aktin fizik si mënyrë për të ndjerë dashuri dhe përkatësi.
Kur kjo afërsi mungon për shkak të stresit apo lodhjes së partneres, ata ndihen të refuzuar.
Terapia mund të ndihmojë çiftet të gjejnë gjuhën e përbashkët dhe të rikthejnë balancën në marrëdhënie.
Burrat gjithnjë e më shumë po thyejnë tabunë e të folurit për ndjenjat dhe vështirësitë emocionale. Me ndihmën e duhur profesionale, ata jo vetëm që përmirësojnë veten, por edhe marrëdhëniet e tyre.
