Disa i përshkruajnë si lëvizje të çuditshme që “çlirojnë tensionin”, por ekspertët thonë se provat shkencore janë të kufizuara dhe jo për të gjithë është ide e mirë. Edhe pse aktiviteti fizik mund të ndihmojë në uljen e stresit dhe përmirësimin e humorit, shpesh është e vështirë të gjeni kohë dhe energji për stërvitje të rregullta, sidomos kur ndiheni të mbingarkuar. Ndoshta pikërisht për këtë arsye dridhja somatike, lëvizje të shkurtra dhe disi kaotike të trupit, është bërë popullore në TikTok si një mënyrë e thjeshtë për të zbutur stresin.
Dridhja somatike mund të duket ndryshe nga personi në person, por zakonisht përfshin disa minuta kërcimesh të lira, tundje të duarve dhe goditje të lehta të këmbëve në dysheme. Muzika është sipas dëshirës.
Një person thotë se dridhja somatike duket dhe ndihet e çuditshme “derisa të fillojë të funksionojë dhe trupi juaj më në fund të nisë të lirojë gjithçka që ka mbajtur me vite”. Dridhja somatike mund t’u ndihmojë disa njerëzve të menaxhojnë stresin e lehtë të përditshëm, thotë Per Erez, terapist. Mund të ndihmojë, por nuk është zëvendësim i plotë për punë më të thellë…
Sipas tij, funksionon më mirë si pjesë e një qasjeje të kombinuar që përfshin aktivitet aerob të rregullt dhe praktika më të ngadalta e të vetëdijshme, si joga dhe tai chi. Për mirëqenie afatgjatë të humorit, më e rëndësishmja është qëndrueshmëria dhe përsëritja.
Çfarë është dridhja somatike
Dridhja somatike është pjesë e terapisë somatike, një qasje që ju nxit të bëheni më të vetëdijshëm për ndjesitë trupore dhe të ndiheni më të sigurt në trupin tuaj. Kjo e bën më të lehtë eksplorimin e mendimeve, emocioneve dhe kujtimeve, sipas Harvard Health Publishing.
Terapia somatike merret më pak me të folurit për problemet dhe më shumë me faktin që sistemi nervor të ndihet mjaftueshëm i sigurt për t’u qetësuar ndërsa i përpunoni, shpjegon Erez. Qasja bazohet në idenë se stresi i fortë, i vazhdueshëm ose trauma e rëndë mund të krijojnë modele të qëndrueshme në trup, si mënyra e frymëmarrjes, tonusi i muskujve, qëndrimi, tretja, niveli i vigjilencës dhe angazhimi emocional. Këto modele nuk ndryshojnë automatikisht vetëm sepse i kuptojmë me mend, shton Erez.
Lëvizjet e buta të dridhjes dhe ndryshimet e pozicionit synojnë ta ndihmojnë trupin të vërejë ku mban tension, të “përfundojë” reagime fizike ndaj stresit që mund të jenë ndërprerë dhe të rregullojë sistemin nervor. Këto lëvizje mund të mbështesin punën mendore që nevojitet për shërim. Megjithatë, dridhja somatike nuk zgjidh trauma komplekse, stres afatgjatë apo nuk e nxjerr sistemin nervor nga gjendja kronike e hipervigjilencës. Por për stres të lehtë, të përditshëm, mund të jetë “çuditërisht efektive”. Edhe vetëm disa minuta mund të sjellin ndikim të përkohshëm, si humor më i mirë ose më pak tension muskulor.
Pse prapë mund t’ju ndihmojë
Përfitimi më i madh i dridhjes somatike mund të jetë se e kthen menaxhimin e stresit në një zakon të thjeshtë të përditshëm, thotë Scott Langenecker, profesor. Ai vlerëson se dridhja somatike mund të jetë një nisje e mirë e një rutine ku më pas përfshihen edhe elemente të tjera, si vëmendja e vetëdijshme, joga ose aktiviteti fizik i rregullt.
Kush mund ta praktikojë dhe kush duhet të ketë kujdes
Ta provoni në shtëpi është në rregull, për sa kohë jeni në gjendje të mirë shëndetësore dhe synoni të lehtësoni stres të lehtë, thotë Erez. Megjithatë, kujdes u rekomandohet personave me histori traume të rëndë ose me çrregullim të stresit pas traumës (PTSD), si dhe atyre që kanë lëndime, probleme me nyje, epilepsi, çrregullim paniku, çrregullim bipolar ose psikozë. Arsyeja është se dridhja somatike ndonjëherë mund të nxisë rikujtime të dhimbshme, të rrisë panikun ose të tejkalojë aftësinë e vetërregullimit.
Si ta provoni dridhjen somatike
Sipas Erez, funksionon më mirë zbathur, në një hapësirë private me vend të mjaftueshëm për lëvizje. Mund të improvizoni lëvizjet si t’ju përshtaten, por këto hapa mund t’ju ndihmojnë:
- Qëndroni në këmbë me gjunjët pak të përkulur
- Filloni të kërceni lehtë mbi thembra
- Lëreni lëvizjen të përhapet natyrshëm lart nëpër trup
- Relaksoni krahët dhe mbajeni nofullën të çliruar
- Lejojeni trupin të udhëheqë, pa e detyruar ndonjë lëvizje të caktuar
Është mirë të nisni me një deri në dy minuta dhe gradualisht ta rrisni në rreth pesë minuta, nëse nuk ndjeni marramendje apo mbingarkesë. Synoni dy deri në katër seanca në javë. Më shumë nuk do të thotë domosdoshmërisht më mirë, thotë Erez.
