Një përplasje ligjore gjithnjë e më e ashpër në Hollywood po përfshin emra të njohur të industrisë së filmit dhe muzikës, ku së fundmi është përfshirë edhe ylli i popit, Taylor Swift.
Në një dokument të ri të paraqitur në gjykatë, avokatët e aktorit Justin Baldoni kanë ngritur një akuzë të fortë ndaj aktores Blake Lively, duke pretenduar se ajo ka ushtruar presion ndaj mikes së saj të ngushtë, Taylor Swift, që të shprehej publikisht në mbështetje të saj në lidhje me një çështje gjyqësore që lidhet me filmin “It Ends With Us”.
Sipas pretendimeve, Lively ka kërcënuar Swift-in se do të publikonte mesazhe private të saj nëse nuk do të bënte një deklaratë mbështetëse.
Këto akuza janë hedhur poshtë kategorikisht nga avokati i Lively, Mike Gottlieb, i cili i cilësoi si “të pavërteta dhe të pabazuara në realitet”.
Nuk ka asnjë të vërtetë në këto pretendime të turpshme. Janë thjesht spekulime nga burime anonime, dhe më shumë një përpjekje për të hedhur baltë sesa për të zbardhur të vërtetën
– u shpreh Gottlieb për revistën “People”.
Në një letër të datës 14 maj, avokati i Baldonit, Bryan Freedman, shprehet se një burim “i besueshëm” ka informuar se Lively i kishte kërkuar Swift-it të fshinte disa mesazhe të ndjeshme dhe se përfaqësuesit ligjorë të Lively ishin në kontakt me ekipin ligjor të Swift-it, duke kërkuar një deklaratë publike — me paralajmërimin se, në të kundërt, do të bëheshin publike komunikime personale.
Freedman deklaron gjithashtu se avokati i Swift-it e ka interpretuar këtë veprim si një përpjekje për të “kërcënuar dhe intimiduar një dëshmitare kyçe në këtë çështje”.
Më herët, më 9 maj, u bë e ditur se Taylor Swift, 35 vjeç, është zyrtarisht thirrur me urdhër gjykate për të dëshmuar në këtë rast ligjor.
Procesi nisi pasi Blake Lively, 37 vjeç, paditi Justin Baldonin, 41 vjeç, për ngacmim seksual dhe hakmarrje në ambientet e xhirimeve. Aktori i ka mohuar akuzat dhe ka paraqitur një kundërpadi prej 400 milionë dollarësh për shpifje.
Çështja pritet të vijojë të zgjerohet, ndërsa pritet dëshmia e Taylor Swift në seancat e ardhshme.
