Vitin e kaluar, Shqipëria kryesoi Europën për normat më të larta të migracionit neto negativ (kthimet minus ikjet), me -12.1 të larguar nga vendi për 1000 banorë, nga -11.7 që ishte ky tregues më 2022-shin. Emigrimi neto jo vetëm që nuk po përmirësohet, por fenomeni është bërë kronik e po thellohet në mënyrë të qëndrueshme.
Të dhënat e Eurostat-it tregojnë se për çdo 1000 banorë, mbi 12 janë larguar nga vendi vitin e kaluar, një normë shumë herë më e lartë se vendet e tjera të Rajonit dhe Europës Lindore. Në shumicën prej tyre, më 2024-ën, kthimet në shtëpi janë më të larta se ikjet.
Në pjesën më të madhe të Bashkimit Europian ka rënie të emigracionit pas vitit të jashtëzakonshëm 2022, kur lufta në Ukrainë dhe lirimi i kufizimeve pandemike sollën flukse të larta lëvizjeje, por në Shqipëri tendenca është krejt e kundërt. Emigrimi nuk po ndalet dhe duket se nuk ka asnjë ngadalësim real.
Rezultatet tregojnë se në shumicën e vendeve te Ballkanit kthimet janë më të larta se ikjet më 2024-ën. Në Bosnjë, emigracioni neto ishte 0.1% më 2024-ën, nga një trend negativ në vitet e shkuara. Bilanci i migracionit neto u kthye pozitiv në Maqedoninë e Veriut , +0.3 më 2024-ën, nga negativ që ishte në vitet e shkuara. Gjithashtu, në Serbi ka tendenca pozitive pasi ikjet me kthimet u barazuan më 2024-ën, nga një bilanc negativ që ishte në të shkuarën.
Sipas të dhënave zyrtare të INSTAT-it për 1 janarin 2025, mosha mediane e popullsisë shqiptare rrit me 0,8 vjet brenda 1 viti duke arritur në 44,3 vjeç, ndërsa emigracioni neto (ikjet minus ardhjet) arritën në rreth -29 mijë persona. Në dy vite 2023 dhe 2024, emigrimi neto shënoi -72,597 vetë.
Nga 2015-ta deri më 2020-ën, emigracioni neto (ikjet minus ardhjet) ishte rreth -16 mijë persona në vit, 80% e tyre të rinj, ndërsa nga 2020 – 2025 ky tregues është mesatarisht -34,5 mijë në vit. Emigracioni i të rinjve u rrit më shumë se dyfishi pas pandemisë.
Anketat e Monitorit kanë treguar se njerëzit nuk po largohen vetëm nga varfëria, por edhe mungesa e shpresës se gjërat mund të përmirësohen de gjithashtu vlerësojnë të rëndësishme mungesën e cilësisë në shërbimet shëndetësore dhe arsimore.
Më shumë se 66% e të anketuarve që jetojnë në Shqipëri, 568 persona nga 857 gjithsej, dhanë si arsye për emigrimin “mungesën e perspektives për të ardhmen”.
Gjithashtu, më shumë se gjysma mendojnë si arsyen e dytë më kryesore për largimin nga vendi “standardet më të larta të jetesës”, në vend të tretë “mungesa e një shërbimi shëndetësor të përshtatshëm”, në vend të katërt, “mungesa e sigurisë dhe stabilitetit politik”, ndërsa 46% e të anketuarve kishin si një arsye “arsim më të mirë për fëmijët”.
Ndryshe nga vendet që kanë krijuar politika për të tërhequr ose rikthyer Diasporën, Shqipëria nuk ka asnjë politikë efektive për të ruajtur apo kthyer qytetarët e saj. Për më tepër, shpesh emigrimi është parë si “zgjidhje” e heshtur për të ulur presionin ekonomik dhe social brenda vendit.
Kjo humbje e vazhdueshme njerëzore solli pasoja të drejtpërdrejta ekonomike, sociale dhe demografike. Tregu i punës po ngushtohet, popullsia po plaket dhe zonat rurale po boshatisen. Shërbimet publike, nga arsimi tek shëndetësia, po e ndiejnë mungesën e specialistëve, ndërsa investimet po zhvendosen drejt vendeve me më shumë stabilitet demografik.
Nëse në disa vende të rajonit kjo prirje po zbutet falë politikave të rikthimit ose integrimit në tregje më të mëdha, në Shqipëri mungesa e një strategjie të qartë për të ndaluar ose kthyer valët e emigrimit vetëm sa po e përkeqëson situatën./ Monitor
