Qeveria franceze ka dalë në mbrojtje të vendimit për t’i dhënë shtetësinë aktorit të famshëm George Clooney dhe bashkëshortes së tij, Amal Clooney, duke theksuar se çifti është pritur zyrtarisht si qytetarë të rinj të Francës pas një procedure të rregullt dhe të detajuar.
Ministria franceze për Evropën dhe Punët e Jashtme (Quai d’Orsay) sqaroi se Clooney dhe bashkëshortja e tij iu nënshtruan të gjitha hapave ligjorë të kërkuar, përfshirë kontrolle sigurie, intervista të shumta dhe përmbushje të detyrimeve tatimore, njësoj si çdo aplikant tjetër për shtetësi.
Reagimi zyrtar erdhi pas debatit të gjerë publik që u ndez pasi u bë e ditur se George dhe Amal Clooney, së bashku me binjakët e tyre Alexander dhe Ella, janë tashmë shtetas francezë.
Zëvendësministrja e Brendshme, Marie-Pierre Vedrenne, ngriti shqetësime mbi mesazhin që mund të përcillet nga ky vendim, duke vënë në dukje rrezikun e perceptimit të standardeve të dyfishta në dhënien e shtetësisë.
Ajo u shpreh se ndonëse është nder që një figurë si Clooney ka kërkuar shtetësinë franceze, procesi duhet të shihet me kujdes nga opinioni publik.
Nga ana tjetër, ministri i Brendshëm Laurent Nunez e cilësoi këtë zhvillim si një përfitim për Francën, duke theksuar se vendimi është marrë pas një shqyrtimi të kujdesshëm dhe me miratimin e institucioneve përkatëse.
Lajmi ka ngjallur reagime edhe përtej Atlantikut. Presidenti amerikan Donald Trump komentoi në platformën Truth Social, duke e quajtur dhënien e shtetësisë “lajm të mirë”, por nuk kurseu kritikat ndaj aktorit për qëndrimet e tij politike.
