Shumë njerëz e konsiderojnë aftësinë për të fjetur menjëherë sapo shtrihen në krevat si një bekim. Megjithatë, ekspertët e gjumit paralajmërojnë se ky zakon, që në pamje të parë duket i padëmshëm, mund të jetë një tregues se organizmi nuk po pushon aq mirë sa mendoni.
Sipas farmacistit Omar El-Gohari, një personi të rritur dhe të shëndetshëm zakonisht i duhen rreth 10 deri në 20 minuta për të rënë në gjumë. Kur dikush fle pothuajse menjëherë çdo natë, kjo mund të jetë shenjë e mungesës kronike të gjumit.
Edhe pse duket ideale, nëse ju zë gjumi brenda vetëm pak minutash sa herë që shtriheni, kjo mund të tregojë se trupi po përpiqet të kompensojë lodhjen e grumbulluar dhe po lufton për të qëndruar zgjuar
-shpjegon ai.
Ekspertët theksojnë se cilësia e gjumit nuk varet vetëm nga numri i orëve që kaloni në shtrat. Shumica e të rriturve kanë nevojë për shtatë deri në nëntë orë gjumë në natë, por po aq e rëndësishme është edhe cilësia e pushimit.
Sipas National Sleep Foundation, gjumi cilësor vlerësohet përmes disa faktorëve kryesorë: sa shpejt ju zë gjumi, sa shpesh zgjoheni gjatë natës, sa kohë qëndroni zgjuar pas zgjimeve dhe sa efektiv është gjumi në raport me kohën totale të kaluar në shtrat.
Në disa raste, zënia shumë e shpejtë e gjumit mund të lidhet edhe me çrregullime të fshehta të gjumit. Një nga më të zakonshmet është apnea obstruktive e gjumit, një gjendje gjatë së cilës frymëmarrja ndalet dhe rifillon vazhdimisht gjatë natës. Kjo mund të shkaktojë lodhje të vazhdueshme, edhe kur personi mendon se ka fjetur mjaftueshëm.
Po ashtu, sindroma e këmbëve të shqetësuara dhe, në raste më të rralla, narkolepsia mund të ndikojnë në përgjumjen e tepruar dhe rënien e menjëhershme në gjumë.
Specialistët këshillojnë që të mos injorohen shenjat si lodhja e vazhdueshme gjatë ditës, vështirësitë në përqendrim, nervozizmi, dhimbjet e kokës apo nevoja e madhe për kafeinë. Nëse këto simptoma shoqërohen me faktin që ju zë gjumi sapo shtriheni, mund të jetë e nevojshme një konsultë me mjekun.
Në fund, ekspertët kujtojnë se gjumi duhet t’ju zgjojë të freskët dhe me energji, jo t’ju lërë me ndjesinë se organizmi po përpiqet vazhdimisht të rikuperojë mungesën e pushimit. Një gjumë që vjen tepër shpejt nuk është gjithmonë shenjë e një nate të mirë, por ndonjëherë mund të jetë sinjali që trupi po kërkon ndihmë.
