Billie Eilish e shndërroi momentin e marrjes së Çmimit MLK Jr. Çmimi i Dashur i Drejtësisë Mjedisore të Komunitetit në një thirrje të fortë alarmi për gjendjen e Shteteve të Bashkuara, duke tërhequr vëmendjen ndaj asaj që ajo e përshkroi si një krizë të thellë sociale, njerëzore dhe mjedisore.
Gjatë ceremonisë së mbajtur në King Center, në Hyatt Regency në qendër të Atlantës, këngëtarja lexoi fjalimin e saj nga një copë e vogël letre, duke u shfaqur e emocionuar dhe e rezervuar.
Ajo theksoi se nuk ndihej e denjë për një vlerësim të tillë në një kohë kur, sipas saj, drejtësia mjedisore dhe të drejtat themelore po përkeqësohen ndjeshëm.
Sinqerisht, nuk ndihem e merituar dhe është shumë e çuditshme të festohem për punën time për drejtësi mjedisore në një kohë kur kjo duket më pak e arritshme se kurrë, duke pasur parasysh gjendjen e vendit tonë dhe të botës
-u shpreh Eilish.
Në vijim të fjalimit, artistja përshkroi një realitet që ajo e konsideron alarmues për shoqërinë amerikane. Ajo foli për arrestime të fqinjëve, dhunë ndaj protestuesve paqësorë, shkelje të të drejtave civile dhe përkeqësim të sigurisë së komuniteteve.
Ne shohim protestues paqësorë të sulmohen dhe të vriten, të drejtat tona civile të na hiqen, burimet për të luftuar krizën klimatike të shterohen nga industritë e lëndëve djegëse fosile dhe bujqësia shtazore që shkatërrojnë planetin
-deklaroi ajo, duke shtuar se ushqimi dhe kujdesi shëndetësor po kthehen në privilegj për të pasurit, e jo në të drejta themelore për të gjithë.
Sipas Eilish, mbrojtja e planetit dhe e komuniteteve nuk është më një prioritet për administratën amerikane, gjë që e bën edhe më të vështirë të festohen arritjet personale.
Është shumë e vështirë të festosh kur nuk ndihemi më të sigurt në shtëpitë tona apo në rrugët tona
-theksoi ajo.
Fjalimi vjen pas polemikave të mëparshme që Eilish shkaktoi me postimet e saj anti-ICE në Instagram, të cilat u kritikuan nga Departamenti i Sigurisë Kombëtare si “retorikë e pakuptimtë”. Megjithatë, artistja nuk ka hequr dorë nga aktivizmi i saj.
Angazhimi i saj social dhe mjedisor është konkretizuar edhe përmes një nisme financiare ambicioze: 11.5 milionë dollarë donacione për organizata që luftojnë për drejtësi klimatike, uljen e ndotjes nga karboni dhe barazinë në aksesin ndaj ushqimit, përmes programit The Changemaker të turneut “Hit Me Hard and Soft”.
Fjalimi i Billie Eilish po komentohet gjerësisht në rrjetet sociale dhe media, duke e pozicionuar këngëtaren jo vetëm si një ikonë muzikore, por edhe si një nga zërat më kritikë të brezit të saj ndaj realitetit politik dhe shoqëror të Amerikës sot.
