Një gjykatë në Berlin i ka dhënë një dënim me burgim me kusht prej 1.5 vitesh një të mituri për ndihmë dhe inkurajim të një sulmi në koncertin e këngëtares Taylor Swift në Vjenë vitin e kaluar. Dënimi u dha sipas kodit penal për të mitur. Në qershor, adoleshenti sirian, i cili ishte 14 vjeç në kohën e përfshirjes së tij në komplotin për të sulmuar koncertin e këngëtares së famshme, u akuzua. Në atë kohë, emri i tij u bë i ditur si Mohammad A., në përputhje me kufizimet e vendosura nga ligjet gjermane të privatësisë.
Gjykata e Berlinit njoftoi sot se i pandehuri kishte pranuar fajin dhe se dënimi, i cili mund të apelohet, është në përputhje me vendimin e kërkuar nga prokurorët. I radikalizuar nga propaganda online e grupit xhihadist të Shtetit Islamik, i pandehuri i dërgoi sulmuesit të mundshëm një video me udhëzime për përgatitjen e bombës dhe e vuri në kontakt me një anëtar të Shtetit Islamik, tha gjykata. Policia ka bërë disa arrestime në lidhje me komplotin e dyshuar për të sulmuar një koncert të Taylor Swift në stadiumin Ernst Happel në kryeqytetin austriak.
Rikujtojmë se Taylor Swift dhe ylli i NFL, Travis Kelce, kanë konfirmuar fejesën e tyre me një moment romantik në një kopsht të mbushur me trëndafila, duke i dhënë fund muajve të spekulimeve. Por ajo që tërhoqi më shumë vëmendjen e mediave ishte unaza gjigante e fejesës që këngëtarja mbante në dorë. Sipas “Page Six”, bëhet fjalë për një diamant të rrallë “Old Mine cut” nga “Artifex Fine Jewelry”, një prerje që daton nga shekujt XVIII–XIX dhe njihet për formën e ngjashme me jastëk, qoshet e rrumbullakëta dhe shkëlqimin unik.
