Simon Cowell është rikthyer fuqishëm në botën e boyband-eve me grupin e tij të ri “December 10”, i formuar përmes serialit të ri të Netflix, “The Next Act”.
Tre dekada pasi shndërroi Robson & Jerome në suksesin e tij të parë pop, e më pas revolucionarizoi industrinë me “Pop Idol”, “The X Factor” dhe “Britain’s Got Talent”, moguli i muzikës po provon sërish fatin me një grup me shtatë anëtarë.
Gjatë një interviste në podcastin “The Rest Is Entertainment”, Cowell u pyet nga moderatorët Richard Osman dhe Marina Hyde se cili ka qenë gabimi më i madh i karrierës së tij dhe çfarë kishte mësuar prej tij. Por përgjigjja e tij i habiti të pranishmit: ai tha se nuk mund të ketë pendesa, për shkak të djalit të tij 11-vjeçar, Eric.
Eric u ‘krijua’ në një ditë dhe në një orë të caktuar. Nëse gjërat do të kishin shkuar ndryshe, nuk besoj se ai do të ishte këtu sot. Prandaj nuk mund të ankohesh shumë për pendesat
-u shpreh Cowell, duke theksuar se beson fuqishëm te fati dhe destinacioni i jetës.
Megjithatë, ai pranoi se ka përjetuar edhe anën e errët të industrisë muzikore, duke folur për zhgënjimet nga njerëz të cilëve u kishte besuar.
Jam ndonjëherë shumë naiv. Vendos gjithë besimin tim te njerëzit dhe ata të zhgënjejnë keq
-tha ai, pa hyrë në detaje.
Cowell theksoi se në këtë fazë të jetës, çdo zhgënjim profesional zbehet përballë familjes.
Familja ime është gjithçka për mua. Kur mora vesh për Eric, nuk e prisja. Por që nga momenti që pashë ekon e tij, gjithçka ndryshoi. Ishte një pikë kthese në jetën time.
Ndërkohë, grupi i ri “December 10” ka ngjallur entuziazëm te fansat pas performancës së tyre të parë të plotë, ku interpretuan një version akustik të këngës “Bye Bye Bye” të NSYNC në Metropolis Studios në Londër.
Grupi përbëhet nga Cruz, Danny, Hendrick, John, Josh, Nicolas dhe Sean, të gjithë adoleshentë që performojnë edhe me instrumente muzikore.
Edhe pse seriali “The Next Act” është kritikuar ashpër nga disa media si “i vjetruar” dhe “një kopje e X Factor-it”, fansat kanë reaguar pozitivisht, duke lavdëruar vokalin dhe energjinë e grupit të ri.
Simon Cowell mbetet një nga figurat më me ndikim në industrinë e muzikës dhe televizionit, pasi gjatë karrierës së tij ka krijuar emra të mëdhenj si One Direction, Little Mix, Susan Boyle dhe Westlife. Me këtë projekt të ri, ai duket i vendosur të provojë edhe një herë se instinkti i tij për yjet e rinj nuk është shuar.
