Pas një vale spekulimesh gjatë 24 orëve të fundit, Taylor Swift ka konfirmuar publikimin e albumit të saj të 12-të në studio, me titull “The Life of a Showgirl”.
Këngëtarja e njoftoi projektin e ri në faqen e saj zyrtare pak minuta pasi një numërues përfundoi në orën 12:12 të mëngjesit ET (06:12 CET) të sotme.
Njoftimi erdhi pasi “Taylor Nation”, një degë zyrtare e ekipit të marketingut të Swift, publikoi në TikTok një seri prej 12 imazhesh ku ajo shfaqej e veshur me ngjyrë portokalli, të shoqëruara me mbishkrimin:
Po mendoj për kur tha ‘Do shihemi në epokën tjetër…’
Fansat vunë re se 12 minuta para këtij postimi, podcast-i i njohur “New Heights”, i drejtuar nga partneri i Swift, Travis Kelce, kishte shpërndarë në rrjetet sociale një imazh portokalli me një siluetë misterioze.
Më pas, një video promovuese tregoi këngëtaren duke nxjerrë albumin nga një çantë, ndërsa kopertina mbetet e turbulluar për momentin, si në faqen e saj zyrtare.
Paraqitja e Swift në “New Heights”, e planifikuar për nesër në orën 19:00 ET (01:00 CET), do të shënojë herën e parë që ajo merr pjesë në emisionin e partnerit, me të cilin është në një lidhje që nga viti 2023.
