Brian Thompson, CEO i divizionit të sigurimeve në UnitedHealthcare, u vra pranë hyrjes së Hotel Hilton në Midtown Manhattan nga një person me fytyrën e mbuluar. Ngjarja ndodhi në rrethana ende të paqarta, ndërsa policia e Nju Jorkut ka nisur një operacion për kapjen e autorit të krimit, i cili përshkruhet si i dobët, rreth 1.80 metra i gjatë dhe i veshur krejtësisht me të zeza.
Thompson nuk po qëndronte në hotel, por kishte ardhur në qytet për të marrë pjesë në një konferencë investitorësh, detajet e së cilës ishin publike. Autori i krimit e kishte pritur në trotuar dhe e qëlloi me armë në gjoks, në orën 7 të mëngjesit, nga një distancë shumë e afërt. Thompson u dërgua me urgjencë në spitalin Mount Sinai West, por fatkeqësisht ndërroi jetë pak më vonë.
Të tjera detaje kanë dalë lidhur me vrasjen. Sipas mediave të huaja, bëhet me dije se policia konfirmoi se kishte fjalë të shënuara në tre gëzhoja të gjetura në skenën e krimit. Partneri i BBC-së në SHBA, CBS News tani po raporton se fjalët “mohoj”, “mbroj” dhe “zhbën” janë shkruar me përpikmëri, jo të gdhendura, mbi gëzhojat, sipas një burimi të informuar për hetimin.
Nga pamjet e filmuara nga kamerat e sigurisë në zonë, sulmuesi dukej se ishte duke buzëqeshur para se të qëllonte për vdekje Brian Thompson, shefin ekzekutiv të UnitedHealthcare. Policia thotë se personi i armatosur kishte veshur një maskë dhe pamjet e tregojnë atë duke ecur ngadalë pas Thompson, përpara se ta qëllonte disa herë pas shpine viktimën.
