Nuk mund të ndodhë të mos keni dëgjuar për ardhjen e Dua Lipa-s në Tiranë. Ylli i muzikës botërore ka mbërritur ditën e djeshme, e shoqëruar nga prindërit, Dukagjin e Anesa Lipa, si dhe i fejuari, vëllai i motrave modele më të famshme Gigi dhe Bella, Anwar Hadid.
Fillimisht, këngëtarja u prit nga kryebashkiaku i Tiranës, Erion Veliaj dhe më pas nga vetë kryeministri i vendit, Edi Rama. Por, duket se një takim edhe më special e ka pritur Dua-n, pasi ajo është takuar me ish- të dashurin e saj, reperin Ledri Vula dhe familjen e tij, bashkëshorten Sarën dhe vajzën Poem.
Të gjithë e dinë për lidhjen që Ledri dhe Dua kanë patur në të shkuarën e tyre dhe ishte pikërisht distanca ajo që i ndau. Asokohe, Lipa jetonte në Londër dhe reperit i duhej të lëvizte shpesh për shkak të koncerteve.
Tanimë, të dy kanë vazhduar jetën e tyre, Ledri është martuar dhe është bërë baba i vogëlushes së tij, Poem, ndërsa Dua vazhdon e lumtur karrierën e saj shumë të suksesshme ndërkombëtare dhe lidhjen me Anwar-in. Megjithatë, duket se dyshja kanë ruajtur një raport të mrekullueshëm, siç ndodh rrallë herë me ish- të dashurit. Jo vetëm që komunikojnë, por Ledri dhe Dua janë takuar menjëherë pas ardhjes së saj në Tiranë.
Në një fotografi të publikuar nga vetë Sara, duket ajo vetë, Ledri, Dua dhe e vogla Poem.
