Një postim i guximshëm nga Cruz Beckham ka tërhequr menjëherë vëmendjen në rrjet, por duket se nuk është pritur aspak mirë nga nëna e tij, Victoria Beckham.
Në kuadër të promovimit të këngës së tij të re “Waste Your Pain”, artisti 21-vjeçar publikoi një foto ku shfaqet i zhveshur në një skelë në Miami, duke mbuluar pjesët intime me diskun e projektit muzikor.
Reagimi i ish-anëtares së Spice Girls nuk vonoi. Ajo komentoi publikisht me një mesazh të shkurtër, por plot habi:
Vërtet Cruz!!!
-duke shtuar edhe një emoji të tronditur, një reagim që u bë menjëherë viral.
Postimi ndezi diskutime të shumta mes ndjekësve, të cilët u ndanë mes atyre që e mbështesin guximin e artistit dhe atyre që e konsiderojnë të tepruar.
Ndërkohë, publikimi i këngës vjen pas përfundimit të turneut të tij të parë në Mbretërinë e Bashkuar me grupin The Breakers, ku prezantoi materiale të reja muzikore.
Sipas vetë Cruz, projekti i fundit trajton tema si dashuria për veten, pranimi dhe një fillim i ri.
Në një bashkëbisedim me fansat, ai zbuloi edhe këshillat që ka marrë nga prindërit: të jetë i sjellshëm, të punojë fort dhe të jetë i lehtë për bashkëpunim.
Sa i përket albumit të parë, Cruz la të kuptohet se ende nuk ka një datë konkrete publikimi, duke theksuar se është ende në proces krijimi dhe eksperimentimi me këngë të reja.
