Në Ditën e Pavarësisë së Kosovës, brenda shtëpisë së Big Brother VIP Albania është regjistruar një moment i veçantë emocional, kur banorja Brikena ndau historinë e saj personale lidhur me humbjet gjatë luftës së Kosovës.
Ndryshe nga banorët e tjerë, të cilët festuan me këngë patriotike, Brikena zgjodhi të qëndronte e ulur dhe u përlot, duke shprehur ndjenjat e saj në mënyrë të sinqertë.
Më pas, në “dhomën e rrëfimit”, ajo shpjegoi se reagimi i saj ishte i lidhur me përjetimet e dhimbshme të familjes së saj gjatë luftës.
Kam humbur disa familjarë në luftën e Kosovës. Sa herë i dëgjojmë këto këngë, prekem shumë
-tha Brikena, teksa kujtonte tragjeditë që kanë prekur të afërmit e saj.
Megjithatë, ajo shtoi se, pavarësisht dhimbjes, ndihet e lumtur për vendin dhe për rrugën që Kosova ka ndjekur gjatë viteve:
Jemi të lumtur sot, duke e ditur se si kanë qenë rrethanat.
Rrëfimi i saj ka ngjallur emocione të forta te banorët dhe shikuesit, duke rikujtuar sakrificat e bëra gjatë luftës dhe rëndësinë e Ditës së Pavarësisë për shqiptarët në mbarë botën.
