Mbante të fshehura qindra litra naftë kontrabandë në banesë, arrestohet në flagrancë 49-vjeçari në Prrenjas. Policia e ndaloi për veprat penale “Kontrabanda me mallra për të cilat paguhet akcizë”, “Tregtimi dhe transporti i mallrave që janë kontrabandë” dhe “Ruajtja apo depozitimi i mallrave kontrabandë”.
Njoftimi policor:
Specialistët e Seksionit për Hetimin e Krimeve Ekonomike dhe Financiare, në vijim të punës për evidentimin dhe goditjen e veprimtarive kriminale në çdo formë të shfaqes së tyre, kanë goditur 1 rast të kontrabandës së mallrave.
Për këtë rast u arrestua në flagrancë shtetasi G. L., 49 vjeç, banues në Prrenjas, për veprat penale “Kontrabanda me mallra për të cilat paguhet akcizë”, “Tregtimi dhe transporti i mallrave që janë kontrabandë” dhe “Ruajtja apo depozitimi i mallrave kontrabandë”, pasi gjatë kontrollit të ushtruar në banesën e tij, janë gjetur qindra litra naftë e dyshuar e kontrabanduar.
Në një tjetër zhvillim, më herët, policia vuri në pranga një punonjës të IMT-së Elbasan, pasi ishte shpallur në kërkim me urdhër të SPAK-ut. I dyshuari, G.B, 51 vjeç akuzohet për veprat penale “Korrupsioni pasiv i personave që ushtrojnë funksione publike” dhe “Shpërdorimi i detyrës”.
Dyshohet se në kohën kur mbante detyrën si punonjës i IMT-së në Elbasan, ky shtetas nuk kreu detyrat funksionale për një objekt të ndërtuar pa leje e mori ryshfet në prill të këtij viti. Materialet procedurale i kaluan Prokurorisë së Elbasanit dhe SPAK-ut, për veprime të mëtejshme.
Njoftimi zyrtar i Policisë Elbasan:
Ndalohet një 51-vjeçar i shpallur në kërkim për korrupsion dhe shpërdorim të detyrës. U bë ndalimi i shtetasit në kërkim G.B., 51 vjeç, banues në Elbasan. Prokuroria e Posaçme Kundër Korrupsionit dhe Krimit të organizuar Tiranë, me vendimin e datës 29.05.2024, ka urdhëruar ndalimin e tij, për veprat penale “Korrupsioni pasiv i personave që ushtrojnë funksione publike” dhe “Shpërdorimi i detyrës.
51-vjeçari, në muajin prill 2024, gjatë kohës që mbante detyrën punonjës i IMT Elbasan, nuk ka kryer detyrat funksionale për një objekt të ndërtuar pa leje dhe ka marrë ryshfet. Materialet procedurale i kaluan Prokurorisë së Elbasanit dhe SPAK-ut, për veprime të mëtejshme.
