Taylor Swift ka vendosur një standard të ri në industrinë muzikore amerikane me publikimin e albumit të saj të fundit, “The Life of a Showgirl”.
Sipas të dhënave fillestare nga firma Luminate, albumi ka arritur mbi 3.5 milionë shitje të barasvlershme në SHBA vetëm në pesë ditët e para — një shifër që tashmë tejkalon rekordin e vendosur nga Adele me albumin “25” para 10 vitesh.
Nga këto 3.5 milionë njësi, rreth 3.2 milionë janë shitje të plota të albumit, ndërsa 2.7 milionë kanë ndodhur vetëm ditën e parë, duke treguar se shumica e fansave e kishin porositur paraprakisht albumin pa publikimin e këngëve individuale.
Përveç shitjeve të jashtëzakonshme, Swift ka përdorur një dokumentar 89-minutësh për të promovuar albumin, duke përfshirë premierën e videoklipit “The Fate of Ophelia” dhe pamje nga prapaskenat, aktivitet që i ka sjellë artistes 33 milionë dollarë vetëm nga shitja e biletave në SHBA dhe Kanada.
Edhe pse kritikat kanë qenë të përziera — Pitchfork i dha një vlerësim 5.9 nga 10, ndërsa The Guardian dy yje nga pesë — Taylor e ka përqafuar këtë reagim:
Nuk jam policia e artit. E mirëpres kaosin
-tha ajo në një intervistë me Apple Music.
Suksesi i albumit tregon se, pavarësisht dominimit të platformave digjitale si Spotify dhe Apple Music, formatet tradicionale si CD-të dhe vinyl vazhdojnë të luajnë një rol të madh.
Deri tani, albumi ka shitur 1.2 milionë kopje në vinyl, duke e tejkaluar rekordin e saj të mëparshëm prej 859,000 kopjesh me albumin “The Tortured Poets Department”.
Kjo arritje konfirmon fuqinë e jashtëzakonshme të Taylor Swift dhe ndikimin e saj të qëndrueshëm në industrinë muzikore, duke shënuar një moment historik për shitjet e albumeve në epokën digjitale.
