Protestat dhe kritikat kundër Teslas dhe themeluesit të kompanisë Elon Musk kanë qenë të pranishme për një kohë të gjatë. Shitjet e automjeteve elektrike kanë rënë ndjeshëm në tregjet kryesore globale dhe një nivel i ri proteste u demonstrua nga një veteran 98-vjeçar i Luftës së Dytë Botërore. Bëhet fjalë për britanikun e njohur si Ken, i cili kritikon Musk dhe e akuzon për promovim të ideve fashiste. Kështu ai vendosi të shprehë qëndrimin e tij në një mënyrë shumë publike dhe brutale.
Në një video të postuar në YouTube, Ken tha se e kujton fashizmin dhe beson se ai po kthehet. “Elon Musk, njeriu më i pasur në botë, përdor fuqinë e tij të madhe për të mbështetur të djathtën ekstreme në Evropë dhe paratë e tij vijnë nga shitja e makinave Tesla”-tha ai. Për të dërguar një mesazh të qartë dhe për të shprehur qëndrimin e tij, Ken ka drejtuar një tank Sherman, i cili është përdorur gjatë Luftës së Dytë Botërore, mbi një Tesla Model 3.
Videoja duket se është filmuar në një fushë britanike dhe makina kishte targa me fjalët “fashizëm”. Në vetëm pak sekonda, tanku historik u ngjit mbi makinë dhe e shkatërroi atë. Model 3 është një nga makinat më të sigurta të prodhimit në treg, por asnjë test përplasjeje nuk mund ta përgatisë atë për një tank. Ndërkaq, shitjet e Tesla-s vazhdojnë të bien në të gjithë Evropën, edhe pse blerësit e makinave atje blejnë gjithnjë e më shumë automjete elektrike.
Shitjet e Tesla-s ranë ndjeshëm në prill në Mbretërinë e Bashkuar, Holandë, Danimarkë dhe Portugali, si dhe në Suedi dhe Francë, sipas shifrave mujore të shitjeve. Ashtu si në Shtetet e Bashkuara, politika e drejtorit ekzekutiv të Tesla-s, Elon Musk, ka frymëzuar reagime dhe protesta në të gjithë Evropën.
Musk ka mbështetur disa kandidatë politikë të ekstremit të djathtë në Gjermani dhe Mbretërinë e Bashkuar. Dhe duke pasur parasysh rolin e tij të profilit të lartë në administratën Trump, zemërimi për kërcënimin për të vendosur tarifa të larta për importet evropiane mund të jetë gjithashtu duke i larguar disa blerës evropianë. Në Mbretërinë e Bashkuar, një nga tregjet e pakta evropiane ku Tesla raportoi shitje më të forta në tremujorin e parë, shitjet e prillit ranë me 62%, sipas grupit tregtar të industrisë së automobilave në Mbretërinë e Bashkuar SMMT.
