Ditët e nxehta mund të jenë tejet të rrezikshme për kafshët shtëpiake, veçanërisht për papagajtë, të cilët janë shumë të ndjeshëm ndaj temperaturave të larta. Edhe pse duken të gjallë dhe të fortë, këta zogj dehidratohen lehtësisht dhe problemi është se shpesh nuk tregojnë shenja të dukshme derisa situata përkeqësohet. Vapa mund të çojë në pasoja serioze shëndetësore, vetëm për shkak të mungesës së ujit. Uji i tyre duhet të jetë i freskët, i pastër dhe gjithmonë i disponueshëm.
Mungesa e ujit, nxehtësia, stresi apo një dietë jo e balancuar mund ta prishin lehtësisht ekuilibrin në trupin e një zogu, duke shkaktuar dehidratim që mund të dëmtojë organet jetësore, madje të rrezikojë jetën e tij. Si ta kuptoni nëse papagalli është i dehidratuar? Fatkeqësisht, shumica e pronarëve e kuptojnë se diçka nuk shkon vetëm kur gjendja është përkeqësuar. Shenjat paralajmëruese përfshijnë sy të fundosur, sqep dhe lëkurë të thatë dhe mungesë energjie.
Një zog i dehidratuar shpesh refuzon ushqimin, merr frymë me shpejtësi dhe duket letargjik. Mund të ketë mukozë të tharë në gojë dhe humbje të papritur në peshë. Në këtë fazë, bëhet fjalë për një emergjencë që kërkon ndihmë të menjëhershme veterinare. Parandalimi është çelësi. Një tas me ujë duhet të jetë gjithmonë i mbushur, i pastër dhe i lehtë për t’u arritur. Ndërroni ujin disa herë në ditë dhe shmangni ekspozimin e tij në rrezet direkte të diellit. Gjatë verës, papagajtë kanë nevojë për të paktën 5% të peshës së trupit të tyre në ujë çdo ditë. Ftohja me kujdes është e lejueshme, një ventilator i lehtë ose një cep i hijezuar mund të ndihmojë, por mos e drejtoni kurrë ajrin direkt tek zogu.
Ju shuajmë një kuriozitet. Papagalli blu është më i madhi nga të gjithë papagajtë. Ky zog është pjesëtar i një specieje të rrallë dhe të rrezikuar. Papagalli blu shihet më shpesh në kopshte zoologjike. Ai ka nevojë për një pronar që ka shumë kohë, durim dhe burime financiare. Ky zog i ndjeshëm emocionalisht mund të rritet pothuajse aq i gjatë sa një shqiponjë. Papagalli blu (Anodorhynchus hyacinthinus) është një metër i gjatë nga koka deri te bishti, hapja e krahëve të tij është rreth 120 cm dhe peshon deri në 1.5 kilogramë.
